అలా 'ఖైదీ'.. 'సాగర సంగమం' అయింది

ప్రశాంత్ వర్మ దర్శకత్వంలో రాజశేఖర్ హీరోగా తెరకెక్కిన చిత్రం 'కల్కి'. ఈ సినిమాలోని ఓ సన్నివేశాన్ని కొన్ని కారణాల వల్ల మార్చి రాయించారట రాజశేఖర్.

రాజశేఖర్, అదా శర్మ ప్రధానపాత్రల్లో తెరకెక్కిన చిత్రం 'కల్కి'. ప్రశాంత్ వర్మ దర్శకుడు. ఇటీవలే విడుదలైన ఈ సినిమాకు బీ, సీ సెంటర్ల నుంచి మంచి ఆదరణ లభిస్తోంది. తాజాగా ఈ మూవీలోని ఓ సన్నివేశానికి సంబంధించి ఆసక్తికర విషయం బయటకొచ్చింది.

ఈ చిత్రంలోని ఒక సీన్‌లో రాజశేఖర్‌ థియేటర్లో కూర్చొని 'సాగర సంగమం' సినిమా చూస్తుండగా.. ఆయన్ను వెతుక్కుంటూ రాహుల్‌ రామకృష్ణ అక్కడకు వస్తాడు. ఆ సమయానికి తెరపై 'తకిట తథిమి' పాట వస్తుంటుంది. వాస్తవానికి మొదట ఈ సీన్‌ తీసినప్పుడు తెరపైన 'ఖైదీ'లోని కీలకమైన చిరంజీవి సీన్‌ను ప్లే చేశారట. అంతేకాదు.. ఆ సన్నివేశం చూస్తూ రాజశేఖర్‌ "ఎవరీ కుర్రాడు బాగా చేస్తున్నాడు.. భవిష్యత్తులో మంచి స్టార్‌ అవుతాడు" అని ఓ డైలాగ్‌ కూడా చెప్తాడట.

ఈ సీన్‌ను యథాతథంగా ఉంచేసి ఉంటే థియేటర్లో ప్రేక్షకుల నుంచి మంచి స్పందన వచ్చేది. కానీ... ఈ సన్నివేశం వల్ల చిరంజీవి అభిమానుల నుంచి ఏమైనా విమర్శలు ఎదురవుతాయేమో అనే అనుమానంతో ఆ సీన్‌ను మార్చి రాయించారట రాజశేఖర్‌. దీని వెనుక మరో కారణం కూడా ఉందట. ఇటీవల జీవిత - రాజశేఖర్‌ దంపతులు వైకాపాలో చేరడం, ఆ తర్వాత గాజువాక నుంచి పవన్‌ కల్యాణ్‌కు వ్యతిరేకంగా ప్రచారం చేయడం వంటివి చేశారు. ఈ నేపథ్యంలో 'ఖైదీ'లోని సీన్‌ వాడుకుంటే కచ్చితంగా తనకు మెగా అభిమానుల నుంచి ట్రోల్స్‌ ఎదురయ్యే అవకాశముందని ఆ సన్నివేశాన్ని మార్చారట.

ఇవీ చూడండి.. స్టార్​ డైరక్టర్​ పార్టీలో చిరు, బాలయ్య, వెంకీ సందడి