హీరోలను ఆరాధించే పద్ధతి నచ్చలేదు: కాజల్

దక్షిణాదిలో అభిమానులు.. కథానాయకుల్ని ఆరాధించే పద్ధతి తనకు నచ్చలేదని చెప్పింది హీరోయిన్ కాజల్. అదే విధంగా బాలీవుడ్, టాలీవుడ్​కు మధ్య తేడాను వివరించింది.

టాలీవుడ్​లో హీరోలను ఆరాధించే పద్ధతి తనకు నచ్చలేదని చెబుతోంది హీరోయిన్ కాజల్ అగర్వాల్. పలువురు అగ్రకథానాయకుల సరసన నటించిన ఈ భామ.. ఇటీవలే ఓ ప్రముఖ టాక్​ షోలో పాల్గొంది. అందులో మాట్లాడుతూ ఉత్తరాది, దక్షిణాది చిత్రసీమలకు మధ్య ఉన్న మంచి, చెడులేంటో తన అనుభవాల నుంచి చెప్పుకొచ్చింది.

"తెలుగు చిత్ర పరిశ్రమలో సమయపాలన, క్రమశిక్షణ చాలా గొప్పగా ఉంటాయి. ఉదయం 6 గంటలకు సెట్స్‌లోకి అడుగుపెడితే ఏడింటికే చిత్రీకరణ మొదలైపోతుంది. సాయంత్రం 6 గంటల కల్లా ప్యాకప్‌ చెప్పెయ్యొచ్చు. కానీ బాలీవుడ్‌లో ఇలాంటి పరిస్థితి కనిపించదు. అక్కడ మధ్యాహ్నం 12కు గానీ చిత్రీకరణ మొదలు కాదు. పూర్తయ్యే సరికి రాత్రి 12 దాటిపోతుంది. అందుకే ఇక్కడ పనిచేసి హిందీలో చేస్తుంటే ఇబ్బందిగానే అనిపిస్తుంటుంది" -కాజల్ అగర్వాల్, హీరోయిన్

అదే విధంగా దక్షిణాదిలో హీరోలను ఆరాధించే పద్ధతి తనకు నచ్చేలేదని చెప్పింది కాజల్.

హీరోయిన్ కాజల్ అగర్వాల్

"తమిళ, మలయాళ చిత్రసీమలు.. సాంకేతిక నిపుణులు-కథ విషయాల్లో చాలా ఉన్నతంగా కనిపిస్తుంటాయి. ఈ రెండు పరిశ్రమల్లో ఎంతో గొప్ప ప్రతిభ దాగి ఉంటుంది. మంచి కథాబలం ఉన్న చిత్రాలు తెరకెక్కించడంలో దేశంలోనే అందరి కన్నా ముందు వరుసలో ఉంటాయి. వారు ఇతర నటీనటులతో మాట్లాడే తీరు ఎంతో గౌరవంగా ఉంటుంది. అయితే తెలుగు, తమిళ చిత్రసీమల్లో కనిపించే హీరోలను ఆరాధించే పద్ధతి నాకు అసలు నచ్చదు. హిందీలో ఇది అసలు కనిపించదు" -కాజల్ అగర్వాల్, హీరోయిన్