సినిమా తారలది రాజవైభోగం. కోరినవన్నీ క్షణాల్లో వాళ్ల ముందుంటాయి. చిన్న సమస్య కూడా ఉండదు. జబ్బుల బారిన పడరు. ఇలా ఎన్నో అనుకుంటాం. కానీ, వాళ్లూ మనలాంటి మనుషులే. వాళ్లకూ ఆరోగ్య సమస్యలుంటాయి. ఆ బాధను పంటి బిగువున భరిస్తూనే మనకు వినోదం పంచుతుంటారు. కానీ, వాళ్లకున్న ఆరోగ్య సమస్యల్ని బయటపెట్టడానికి ఇష్టపడరు. ఇటీవల బాలీవుడ్‌ నటి యామీ గౌతమ్‌ 'కెరాటోసిస్‌ పిలారిస్‌'తో బాధ పడుతున్నానని ధైర్యంగా చెప్పింది. తనది చర్మ సమస్య. ఇంతకన్నా పెద్ద, చిన్న సమస్యలు ఎదుర్కొన్న కొందరు తారల వివరాలు.
షారూఖ్‌ ఖాన్- మానసిక ఒత్తిడి
చాలామందిలాగే బాలీవుడ్‌ బాద్‌షా షారుక్.. కొన్నాళ్లు తీవ్ర మానసిక ఒత్తిడికిలో కూరుకుపోయాడు. 'దిల్‌వాలే' సినిమా షూటింగ్‌ సమయంలో కండరాల్లో చీలికలొచ్చాయి. కొన్ని నెలలపాటు బాధతో విలవిల్లాడిపోయేవాడు. ఈ బాధను తట్టుకోలేక నేను తిరిగి కోలుకుంటానో, లేదో అనే ఒత్తిడితో డిప్రెషన్‌కు లోనయ్యాడు. కొన్నాళ్లు చికిత్స తీసుకున్న తర్వాత ఆ ఒత్తిడి నుంచి బయటికొచ్చాడు. ఈ సమయంలో ఐపీఎల్‌ మ్యాచ్‌లు, అభిమానుల ఆశీస్సులే తిరిగి ఆరోగ్యవంతుడిని కావడానికి కారణమని ఓ ఇంటర్వ్యూలో చెప్పాడు.
ఇలియానా - బాడీ డిస్మార్ఫిక్‌ డిజార్డర్‌
'నేనేం అందంగా లేను', 'నాలో చాలా లోపాలున్నాయి' అనుకుంటూ తనలో తనే కొన్నేళ్లపాటు బాధను అనుభవించింది ఎవరో తెలుసా? తన అందంతో కుర్రకారుకి నిద్ర కరువు చేసిన ఇలియానా. చివరికి ఇది మానసిక ఒత్తిడికి దారి తీసిందట. కుటుంబం, స్నేహితుల అండతో ఆ సమస్య నుంచి బయటపడ్డానని ఓ వెబ్‌సైట్‌కి ఇచ్చిన ఇంటర్వ్యూలో చెప్పింది ఇలియానా.
రజనీకాంత్‌-బ్రాంకైంటిస్‌
దక్షిణాది సూపర్‌స్టార్‌ రజినీకాంత్‌ 2011లో 'ఎమెసిస్‌' అనే అనారోగ్య సమస్యతో బాధపడ్డారు. అంటే తీసుకున్న ఆహారం కడుపులోకి చేరిన వెంటనే వాంతుల రూపంలో మళ్లీ బయటికి రావడం అన్నమాట. ఇది చాలా ఇబ్బందికరమైన పరిస్థితి. దీనికి చికిత్స తీసుకుంటున్న సమయంలోనే బ్రాంకైటిస్‌ బారినపడ్డారు. ఈ సమస్యతో బాధ పడుతూ కొన్నాళ్లు ఐసీయూలో కూడా ఉన్నారు. సింగపూర్‌లో చికిత్స తీసుకున్న తర్వాత కోలుకున్నారు.
సోనాలీ బింద్రే- క్యాన్సర్‌
'ఖడ్గం' హీరోయిన్‌ సోనాలీ బెంద్రే 2018లో మెటస్టాటిక్‌ క్యాన్సర్‌ బారిన పడింది. అది తీవ్రం కావడం వల్ల అమెరికా వెళ్లి చికిత్స తీసుకుంది. ఐదు నెలలపాటు రోగంతో పోరాడి ప్రాణాలు కాపాడుకుంది. తర్వాత క్యాన్సర్‌ వ్యాధి పట్ల తీసుకోవాల్సిన జాగ్రత్తలు, దాని బారిన పడితే ఏం చేయాలనేదానిపై ప్రచారం చేస్తోంది.
సోనమ్‌ కపూర్‌- మధుమేహం
ఫ్యాషన్‌ ఐకాన్‌గా ఉన్న సోనమ్‌కపూర్‌ టీనేజీ నుంచే డయాబెటీస్‌తో బాధ పడిందనే విషయం చాలామందికి తెలియదు. తను అప్పట్లో చాలా లావుగా ఉండేది. కానీ క్రమం తప్పని వ్యాయామం, ఆహారం విషయంలో నియంత్రణ పాటించడం వల్ల నాజూగ్గా మారింది.
స్నేహ ఉల్లాల్‌- ఆటో ఇమ్యూన్‌ డిజార్డర్‌
మనల్ని రోగాల బారి నుంచి కాపాడాల్సిన రక్షణ వ్యవస్థే శత్రువులా మారి దాడి చేస్తే? ఉల్లాసంగా.. ఉత్సాహంగా, కరెంట్‌, సింహా లాంటి సినిమాలతో తెలుగువారికి దగ్గరైన భామ స్నేహా ఉల్లాల్‌ కెరీర్‌ ఊపందుకుంటున్న దశలో ఇదే జబ్బుతో బాధ పడింది. దీర్ఘకాలిక చికిత్స తీసుకోవడంతో కొన్నాళ్లపాటు నటనకే దూరం కావాల్సి వచ్చింది.