తన నటనతో ప్రేక్షకులను మెప్పించి.. అందంతో కుర్రకారు మనసు దోచేస్తుంది హీరోయిన్ రష్మిక. ఇప్పటికి ఈ ముద్దుగుమ్మ చిత్ర సీమలోకి వచ్చి ఐదేళ్లు కావస్తోంది. ఈ సందర్భంగా ఓ మీడియాకు ఇచ్చిన ఇంటర్వ్యూలో 'ఎప్పుడైనా ఈ రంగాన్ని వదిలేయాలనే ఆలోచన వచ్చిందా'? అని అడగ్గా.. ఆసక్తికర విషయాలు పంచుకుంది రష్మిక.
"నిజం చెప్పాలంటే.. నాకు తొలి సినిమా చేసిన వెంటనే ఇలాంటి ఆలోచన వచ్చింది. నా మొదటి చిత్రం 'కిరిక్‌ పార్టీ'’ విడుదలవ్వగానే తెలుగు నుంచి అనేక అవకాశాలు తలుపుతట్టాయి. కానీ, అప్పటికి నేను సినిమాలే పూర్తిగా మానేద్దామనుకున్నా. తెలుగులో నటించడమైతే అసలు సాధ్యం కాదనుకున్నా. ఎందుకంటే తెలుగు నాకసలు పరిచయం లేని భాష. దాంతో ఇటువైపు రావాలన్న ఆలోచనే లేదు. కానీ, తొలి విజయం అందించిన ఉత్సాహం, స్ఫూర్తితో కొన్ని కన్నడ చిత్రాలు ఒప్పుకున్నా. దాంతో తెలుగు నుంచి అవకాశాలొచ్చినా తొలి రెండేళ్లు ఇక్కడ సినిమాలు చెయ్యలేని పరిస్థితి."