థియేటర్లలో 'పాంచ్ పటాకా'.. ఏకంగా ఐదు సినిమాలు

మీకోసం విభిన్న కథలతో తెరకెక్కిన ఐదు సినిమాలు సిద్ధమయ్యాయి. రేపు(శుక్రవారం) థియేటర్లలోకి రానున్నాయి. ఇంతకీ అవేంటి? వాటి కథేంటి? అంత ఆసక్తి వాటిలో ఏముంది?

మీరు సినిమా ప్రేమికులా? బడ్జెట్​తో సంబంధం లేకుండా కంటెంట్​ను మాత్రమే నమ్మి థియేటర్​కు​ వెళ్తారా? అయితే మీ పంట పండినట్లే. ఎందుకంటే రేపు(శుక్రవారం) ఏకంగా ఐదు సినిమాలు థియేటర్లలోకి రానున్నాయి. అభిమానులకు పాంచ్ పటాకా ఇచ్చేందుకు సిద్ధమవుతున్నారు దర్శకనిర్మాతలు. అందులో మూడు తెలుగు చిత్రాలు, రెండు హిందీవి. వీటిలో నితిన్ 'భీష్మ', ఆయుష్మాన్ 'శుభ్ ​మంగళ్' సీక్వెల్​పైన భారీ అంచనాలు నెలకొన్నాయి.

'భీష్మ'తో నితిన్ హిట్​ ట్రాక్ ఎక్కుతాడా?

'శ్రీనివాస కళ్యాణం' తర్వాత దాదాపు ఏడాదిన్నర విరామం తీసుకుని 'భీష్మ'తో ప్రేక్షకుల ముందుకొస్తున్నాడు నితిన్. ముద్దుగుమ్మ రష్మిక హీరోయిన్. ఇందులో కమర్షియల్ హంగులతో పాటు అంతర్లీనంగా కల్తీ ఎరువుల వల్ల ఏర్పడే ఇబ్బందుల గురించి చూపించనున్నారు. ఇప్పటికే ట్రైలర్​ అలరిస్తోంది. మరి ఈ సినిమాతోనైనా నితిన్ హిట్​ ట్రాక్ ఎక్కుతాడేమో చూడాలి.

భీష్మలో నితిన్-రష్మిక జోడీ

దిశ మిస్సింగ్​ ఆధారంగా 'వలయం'

సస్పెన్స్​ కథలు బాగుంటే చాలు.. వాటిని ఆదరించడంలో తెలుగు ప్రేక్షకులు ముందుటారు. ఆ కోవలోనే వస్తున్న చిత్రం 'వలయం'. లక్ష్, దిగంగన హీరోహీరోయిన్లు. తన భార్య 'దిశ' కనిపించకుండా పోతుంది. ఆమెను వెతికే క్రమంలో ఎలాంటి నిజాలు వెలుగులోకి వచ్చాయి? ఆ తర్వాత ఏం జరిగింది? తదితర విషయాలు తెలియాలంటే రేపటి వరకు ఆగాల్సిందే.

వలయం సినిమా లుక్

అమెరికా వెళ్లాలనే యువకుడి కల 'ప్రెషర్ కుక్కర్'

ఈరోజుల్లో తమ పిల్లల్ని వేరే దేశాలకు పంపించడమే లక్ష్యంగా పెట్టుకుంటున్నారు తల్లిదండ్రులు. ఈ విషయమై వారిపైన ఒత్తిడి తెస్తున్నారు. కానీ పరాయి దేశం వెళ్లాక కన్నవాళ్లకు బిడ్డలకు మధ్య ఓ తెలియని దూరం పెరుగుతోంది. ఇలాంటి సున్నితమైన అనేక అంశాల్ని ఇందులో చూపించనున్నారు. ఇప్పటికే ట్రైలర్​ ఆకట్టుకుంటుండగా, సినిమా గురించి ఆసక్తిగా చూస్తున్నారు అభిమానులు.

ప్రెషర్ కుక్కర్ పోస్టర్

దెయ్యాల ఓడలో 'భూత్'

కరణ్​ జోహర్ తొలిసారి నిర్మిస్తున్న హారర్ సినిమా 'భూత్: ద హంటింగ్ షిప్'. బాలీవుడ్ ప్రముఖ నటీనటులు విక్కీ కౌశల్, భూమి పెడ్నేకర్ ప్రధాన పాత్రలు పోషించారు. ముంబయి తీరంలో ఆగిపోయిన ఓడలో కథానాయకుడికి ఎదురైన అనుభవాల సమాహారమే ఈ చిత్రం. మరి అభిమానుల్ని భయపెడుతుందో లేదో చూడాలి.

భూత్ సినిమాలో విక్కీ కౌశల్

ఇద్దరు అబ్బాయిల ప్రేమ.. ప్రేక్షకులకు నచ్చుతుందా?

విభిన్న కథలు విభిన్న పాత్రలతో వీక్షకుల్ని అలరించే బాలీవుడ్ నటుడు ఆయుష్మాన్ ఖురానా. గతేడాది 'డ్రీమ్​గర్ల్', 'ఆర్టికల్ 15', 'బాలా' సినిమాలతో మెప్పించిన ఆయుష్మాన్.. ఈసారి 'శుభ్ మంగళ్ జ్యాదా సావధాన్'తో వస్తున్నాడు. ఇద్దరు అబ్బాయిలు ప్రేమించుకుంటే, వారి కుటుంబాలతో పాటు సమాజంలో ఎలాంటి పరిస్థితులు ఎదురయ్యాయనేదే ఇందులో చూపించనున్నారు. భారీ అంచనాలున్న నేపథ్యంలో మరి ఈ సినిమా ఎలాంటి వసూళ్లు సాధిస్తుందో చూడాలి.

'శుభ్ మంగళ్ జ్యాదా సావధాన్​' సినిమాలోని ఓ సన్నివేశం