ప్రముఖ నటుడు, దర్శకుడు, నట గురువు దేవదాస్ కనకాల మృతి చెందారు. ఆరోగ్య సమస్యలతో హైదరాబాద్ కొండాపూర్లోని కిమ్స్ ఆసుపత్రిలో చికిత్స పొందుతూ శుక్రవారం తుదిశ్వాస విడిచారు. రాజీవ్ కనకాల తండ్రే ఈయన. ప్రముఖ టీవీ యాంకర్ సుమ కనకాల ఈయనకు కోడలు.
వృద్ధాప్యంలో దేవదాస్ కనకాల స్టార్ హీరోలకు గురువుగా ప్రాముఖ్యత
తొలుత సినిమాల్లోకి నటుడిగా ఎంట్రీ ఇచ్చిన దేవదాస్ కనకాల.. ఆ తర్వాత నటనా శిక్షణ ఇవ్వడంలో ప్రసిద్ధి చెందారు. ఇప్పుడున్న ఎందరో స్టార్ హీరోలు, సూపర్స్టార్ రజనీకాంత్, మెగాస్టార్ చిరంజీవి, నటకిరీటీ రాజేంద్రప్రసాద్, శుభలేఖ సుధాకర్, నాజర్, భాను చందర్, అరుణ్ పాండ్యన్, రాంకీ, రఘవరన్ ఈయన వద్దే నటనా ఓనమాలు నేర్చుకున్నారు.
వ్యక్తిగత సమాచారం
యుక్త వయుసులో దేవదాస్ కనకాల 1945 జూలై 30న యానాంలోని కనకాలపేటలో పుట్టిన దేవదాస్.. ఎనిమిది మంది తోబుట్టువులలో పెద్దవాడు. ఆంధ్ర యూనివర్సిటీలో థియేటర్ ఆర్ట్స్లో పట్టా పొందారు. అనంతరం సాంగ్ అండ్ డ్రామా కేంద్ర ప్రభుత్వ పబ్లిసిటీ డివిజన్లో నటుడిగా తన ఉద్యోగ జీవితాన్ని ప్రారంభించారు.
ఈయన సతీమణి లక్ష్మీదేవి కనకాల. కుమారుడు రాజీవ్ కనకాల(నటుడు). కూతురు శ్రీలక్ష్మీ కనకాల.
విభిన్న ప్రతిభావంతులు
సినిమాలు, సీరియల్స్లో నటుడిగా రాణించారు. పుణె ఫిల్మ్ ఇన్‌స్టిట్యూట్‌లో విద్యనభ్యసించిన తొలితరం నటుడు దేవదాస్ కనకాల. ఓ సీత కథ, సిరిసిరి మువ్వ, చెట్టు కింద ప్లీడర్, గోరింటాకు తదితర సినిమాల్లో సహాయ పాత్రల్లో కనిపించి ఆకట్టుకున్నారు. ఆయన నటించిన చివరి చిత్రం 'భరత్ అను నేను'. చలిచీమలు చిత్రంతో దర్శకుడిగానూ ఆకట్టుకున్నారు.
ఫిల్మ్ అండ్ టెలివిజన్ ఇనిస్టిట్యూట్ ఆఫ్ ఆంధ్రప్రదేశ్ అనే నటనా శిక్షణాలయాన్ని స్థాపించి ఎందరో నటీనటులను తీర్చిదిద్దారు.
