ఒక్కరోజు ప్రధానమంత్రిగా అవకాశం వస్తే చేసే మొదటి పని ఏంటని ఎదురైన ప్రశ్నకు నటుడు రానా బదులిచ్చారు. ప్రముఖ తెలుగు ఓటీటీ వేదిక 'ఆహా'లో ప్రసారమయ్యే 'నంబర్.1 యారి' కార్యక్రమంలో రానాకు ఈ ప్రశ్న ఎదురైంది. ఈ కార్యక్రమానికి ప్రముఖ నటులు మంచు లక్ష్మి, రకుల్‌ప్రీత్‌సింగ్‌ హాజరై సందడి చేశారు.
ఈ సందర్భంగా హీరోయిన్ రకుల్ మాట్లాడుతూ.. "మీకు ఒక్కరోజు ప్రధానమంత్రిగా అవకాశం వస్తే చేసే మొదటి పని ఏంటి?" అని రానాను ప్రశ్నించింది. రానా స్పందిస్తూ.. "విద్య, వైద్యం అందరికీ ఉచితంగా అందేలా చర్యలు తీసుకుంటాన"ని అన్నారు. విద్య, వైద్యం ప్రజలకు సక్రమంగా అందిస్తే దేశం అంతా మారిపోతుందని తాను భావిస్తున్నానని రానా తెలిపారు. ఆదివారం రాత్రి ప్రసారమైన ఈ ఎపిసోడ్‌ నవ్వుల పువ్వులు పంచింది.