డ్రగ్స్​ కేసులో హాస్యనటి భర్త కూడా అరెస్టు

మాదకద్రవ్యాల వినియోగం కేసులో బాలీవుడ్​ హాస్యనటి భారతీ సింగ్​తో పాటు ఆమె భర్త హర్ష్​ను అరెస్టు చేశారు. సోదాల్లో భారతీ నివాసంలో గంజాయిని స్వాధీనం చేసుకోగా.. వారిద్దరూ దాన్ని సేవించినట్లు విచారణలో అంగీకరించారని అధికారులు తెలిపారు.

బాలీవుడ్​ హాస్యనటి భారతీ సింగ్​తో పాటు భర్త హర్ష్​ లింబాచియాను నార్కోటిక్స్​ కంట్రోల్​ బ్యూరో (ఎన్​సీబీ) ఆదివారం అరెస్టు చేసింది. శనివారం ఉదయం భారతీసింగ్‌ కార్యాలయం, నివాసంలో సోదాలు నిర్వహించిన ఎన్​సీబీ.. 86.5 గ్రాముల గంజాయిని స్వాధీనం చేసుకుంది.

అనంతరం భారతీసింగ్‌, అమె భర్త హర్ష్‌ లింబాచియాను ముంబయిలోని కార్యాలయానికి తీసుకెళ్లి విచారించారు. వారిద్దరూ గంజాయి తీసుకుంటున్నట్లు అంగీకరించారని.. ఈ నేపథ్యంలో భారతీ సింగ్‌తో పాటు తన భర్తను అరెస్టు చేసినట్లు ఎన్​సీబీ అధికారులు తెలిపారు. ప్రస్తుతం వారిద్దరికి వైద్య పరీక్షల కోసం ఆస్పత్రికి తరలించినట్లు వెల్లడించారు.

సుశాంత్ సింగ్ ఆత్మహత్య అనంతరం బాలీవుడ్‌లో చెలరేగిన మాదకద్రవ్యాల వినియోగం కేసు కలకలం సృష్టించింది. ఈ కేసులో ఇప్పటికే పలువురు అగ్ర నటీనటులను ఎన్​సీబీ విచారించింది.