బాలీవుడ్ నటుడు సుశాంత్సింగ్ రాజ్పుత్ అనుమానాస్పద మృతి కేసును కేంద్ర దర్యాప్తు సంస్థ (సీబీఐ) విచారణ చేస్తోంది. ఈ కేసులో భాగంగా హీరో కుటుంబసభ్యులనూ సీబీఐ ప్రశ్నించే అవకాశం ఉంది. సుశాంత్ తండ్రి, సోదరీమణులు, బావలతో పాటు దిల్లీ ఆస్పత్రికి చెందిన ఓ వైద్యుడిని విచారించనున్నారని తెలుస్తోంది. సుశాంత్ శవపరీక్ష రిపోర్టును ఆల్ ఇండియా ఇనిస్టిట్యూట్ ఆఫ్ మెడికల్ సైన్సెస్ (ఎయిమ్స్‌) ఇప్పటికే సీబీఐకి సమర్పించినట్లు సమాచారం.
కేసు పక్కదోవ పట్టడం లేదు
సుశాంత్ కేసులో సీబీఐ దర్యాప్తు నెమ్మదిగా సాగుతూ, పక్కదారి పడుతుందని హీరో తరఫు న్యాయవాది వికాస్‌, గతవారం ఆరోపించిన నేపథ్యంలో దర్యాప్తు సంస్థ వివరణ ఇచ్చింది. ఈ మృతి కేసులో దర్యాప్తుపై ఇంకా ఎలాంటి తుది అభిప్రాయానికి రాలేదని సీబీఐ తెలిపింది. దీని వెనకున్న అన్ని అంశాలను సమగ్రంగా పరిశీలిస్తున్నట్లు ఓ అధికారి వెల్లడించారు. ప్రస్తుతం వృత్తిపరమైన దర్యాప్తు కొనసాగుతోందని చెప్పిన ఆయన.. విచారణలో ఏ కోణాన్ని విస్మరించలేదని వివరణ ఇచ్చారు.
జూన్‌ 14న ముంబయిలోని తన అపార్ట్‌మెంట్‌లో సుశాంత్ ఉరి వేసుకుని చనిపోయాడు. అనంతరం ఈ కేసును సీబీఐ దర్యాప్తు చేపట్టింది. కొద్ది రోజులుగా డ్ర‌గ్స్కు సంబంధించిన అంశం చర్చనీయాంశమైంది. దీంతో సుశాంత్ కేసును పక్కన పెట్టి.. మాదక ద్రవ్యాలపై దృష్టి సారిస్తున్నారని స‌ర్వ‌త్రా విమ‌ర్శ‌లు వ్య‌క్త‌మ‌వుతున్నాయి.