'కూచిపూడికైనా.. కుంగ్‌ఫూలకైనా... దేనికైనా రెడీ' అంటూ జూనియర్ ఎన్టీఆర్ ‘స్టూడెంట్ నెంబర్ 1’ సినిమాలో పాట పాడుకొన్నారు. ఆ సినిమాలోని పాత్రకే కాదు, నిజ జీవితంలో ఎన్టీఆర్‌కి కూడా వర్తిస్తుంది ఆ పాట. డ్యాన్సుల్లోనైనా.. ఫైట్లలోనైనా... భావోద్వేగాలు పండించడంలోనైనా.. వినోదం పండించడానికైనా... ఇలా దేనికైనా ఎన్టీఆర్ రెడీనే. ఎలాంటి పాత్రలోనైనా అలవోకగా ఒదిగిపోవడం ఆయన ప్రత్యేకత. తాత పోలికలతో పుట్టిన ఎన్టీఆర్... నటన పరంగా తాతకి తగ్గ మనవడు అనిపించుకున్నాడు. నూనూగు మీసాల వయసులోనే రికార్డులతో బాక్సాఫీసును బద్దలు చేసిన ఘనత ఆయనది.
తొలి అడుగుల్లోనే స్టార్ కథానాయకుడిగా ఎదిగాడు ఎన్టీఆర్. ఆ తర్వాత ఆటుపోట్లు ఎదురైనా... పడి లేచిన కెరటంలా మళ్లీ నిలదొక్కుకున్నాడు. ప్రస్తుతం దక్షిణాదిలో అత్యంత శక్తిమంతమైన స్టార్ కథానాయకుల్లో ఒకరిగా కొనసాగుతున్నాడు ఎన్టీఆర్.
సినిమా రంగంపైనే కాకుండా... బుల్లితెరపై కూడా తనదైన ముద్ర వేశాడు జూనియర్ ఎన్టీఆర్. నటన పరంగానే కాకుండా.. గాయకుడిగా కూడా తన ప్రావీణ్యం ప్రదర్శించారు. ‘నాన్నకు ప్రేమతో’ చిత్రంతో 25 సినిమాల మైలురాయిని అధిగమించిన ఆయన ప్రస్తుతం రాజమౌళి దర్శకత్వంలో ‘ఆర్‌.ఆర్‌.ఆర్‌’ సినిమా చిత్రీకరణలో బిజీగా గడుపుతున్నారు.
భాగ్యనగర బంగారం
నందమూరి హరికృష్ణ, షాలినీ దంపతులకు 1983, మే 20న హైదరాబాద్‌లో జన్మించాడు ఎన్టీఆర్. విద్యారణ్య హైస్కూల్‌లో ప్రాథమిక విద్యాభ్యాసం పూర్తి చేశాడు. సెయింట్‌ మేరీస్‌ కళాశాలలో ఇంటర్మీడియట్‌ పూర్తి చేశాడు. చిన్నప్పుడే కూచిపూడి నృత్యంలో ప్రావీణ్యం సంపాదించాడు. బాలనటుడిగా ‘బాలరామాయణం’తో ఎంట్రీ ఇచ్చిన ఆయన, తొలి అడుగులోనే నందితో మెరిసి వెండితెరను పులకింపజేశాడు. లక్ష్మీప్రణతిని 2011 మే 5న వివాహం చేసుకున్నాడు ఎన్టీఆర్. ఆయనకు నందమూరి అభయ్‌రామ్, భార్గవరామ్‌ కుమారులు.
తొలిమెరుగులు తాతగారితోనే...
అంతకు ముందే నందమూరి తారక రామారావు సారథ్యంలో ‘బ్రహ్మర్షి విశ్వామిత్ర’లో అద్భుతమైన నటనను కనబర్చి నటసార్వభౌముడినే మెప్పించాడు ఎన్టీఆర్. చిరు ప్రాయంలోనే చిరుతలా తెలుగు తెరపై నట విశ్వరూపాన్ని చూపించిన ఎన్టీఆర్ కథానాయకుడిగా తెరంగేట్రం చేశాక మరింత జోరు చూపించాడు.