'తండ్రి దర్శకత్వంలో నటించడం తేలిక కాదు'

బాలీవుడ్ దర్శకుడు మహేశ్ భట్ 'సడక్​-2' చిత్రం కోసం మళ్లీ మెగాఫోన్ పట్టనున్నాడు. ఈ సినిమాలో మహేశ్ తనయ ఆలియా భట్​ కూడా నటించనుంది. తన తండ్రి దర్శకత్వంలో నటించడం అంత సులభం కాదంటోంది ఆలియా.

1990ల్లో అగ్రదర్శకుడిగా పేరు తెచ్చుకున్న మహేశ్ భట్ మళ్లీ మెగాఫోన్ పట్టనున్నాడు. సడక్​-2 చిత్రం ద్వారా పునరాగమనం చేయనున్నాడు. ఈ సినిమాలో ఆలియాభట్ ముఖ్య పాత్రలో నటించనుంది. తండ్రి దర్శకత్వంలో తొలిసారి నటించబోతున్న ఆలియా ఈ కాంబినేషన్​ అంత సులభం కాదంటోంది.

"తండ్రిగా ఆయన నాకు తెలుసు.. దర్శకుడిగా సెట్లో ఎలా ఉంటారో తెలియదు. ఈ కాంబినేషన్​ అంత సులభం కాదు. కానీ ఈ చిత్రం కోసం ఎంతో ఆత్రుతగా ఎదురు చూస్తున్నా." - ఆలియా భట్, బాలీవుడ్ నటి

1999లో వచ్చిన 'కార్టూస్'​ చిత్రం తర్వాత మహేశ్ సినిమాలకు దూరమయ్యాడు. ప్రస్తుతం సంజయ్ దత్ ప్రోద్భలంతో సడక్​-2 తెరకెక్కిస్తున్నట్టు ఆలియా తెలిపింది. ఈ చిత్రం 1991లో వచ్చిన సడక్​ సినిమాకు సీక్వెల్​గా తీస్తున్నారు. ఈ సినిమాలో నటించిన సంజయ్, పూజాభట్ సీక్వెల్​లోనూ కనిపించనున్నారు.

ఈ చిత్రంలో ఆదిత్యరాయ్ కపూర్, ఆలియా హీరో హీరోయిన్లుగా నటించనున్నారు. 2020 మార్చి 25న ప్రేక్షకుల ముందుకు రానుందీ చిత్రం.