ఇన్​-స్పేస్ ఛైర్మన్ పదవికి ముగ్గురు శాస్త్రవేత్తల పేర్లు

'ఇన్​-స్పేస్' ఛైర్మన్ పదవి కోసం.. డైరెక్టర్ స్థాయిలో సేవలందిస్తున్న ముగ్గురు ఇస్రో సీనియర్ శాస్త్రవేత్తల పేర్లను పీఎంఓకు పంపించినట్లు అధికారులు తెలిపారు. వీరిలో ఒకరిని ఛైర్మన్​గా ఎంపిక చేయనున్నట్లు చెప్పారు. త్వరలోనే ఇందుకు సంబంధించిన ప్రకటన వెలువడుతుందని స్పష్టం చేశారు.

అంతరిక్ష రంగంలో ప్రైవేటు సంస్థల పాత్ర మెరుగుపర్చేందుకు దోహదపడేలా ఏర్పాటు చేసిన 'ఇండియన్ నేషనల్ స్పేస్ ప్రమోషన్ అండ్ ఆథరైజేషన్ సెంటర్'(ఇన్​-స్పేస్) ఛైర్మన్ పదవి కోసం ఇస్రోకు చెందిన ముగ్గురు సీనియర్ శాస్త్రవేత్తల పేర్లను ప్రధానమంత్రి కార్యాలయానికి పంపించారు అధికారులు.

విక్రమ్ సారాబాయ్ స్పేస్ సెంటర్ డైరెక్టర్ ఎస్​ సోమ్​నాథ్, యూఆర్ రావు శాటిలైట్ సెంటర్ డైరెక్టర్ పీ కున్హికృష్ణన్, ఇస్రో ఇంటీరియల్ సిస్టమ్ యూనిట్ డైరెక్టర్ శ్యామ్ దయాల్ దేవ్​ల పేర్లను ప్రతిపాదించినట్లు అధికారులు తెలిపారు. త్వరలోనే తుది పేరును ఖరారు చేయనున్నట్లు చెప్పారు. ఇందుకు సంబంధించి ఇన్​స్పేస్ ప్రకటన జారీ చేస్తుందని వెల్లడించారు.

ఇన్​-స్పేస్

ఇన్​-స్పేస్ సంస్థ ఏర్పాటును ఆమోదిస్తూ కేంద్ర కేబినెట్ ఈ ఏడాది మొదట్లో నిర్ణయం తీసుకుంది. సింగిల్ విండో నోడల్ ఏజెన్సీగా ఇది ఏర్పాటు చేయాలని సంకల్పించింది. ఇస్రో అంతరిక్ష ప్రయోగాలలో ప్రైవేటు సంస్థలు, స్టార్టప్​లు భాగస్వామ్యం అయ్యేలా ఈ సంస్థ ప్రోత్సాహం అందిస్తుంది. ప్రైవేటు సంస్థలకు అనుమతులు ఇవ్వడం సహా వారి పనితీరును పర్యవేక్షిస్తుంది.

ఇన్​-స్పేస్​ బోర్డులో ప్రైవేటు పరిశ్రమ వర్గాలు, కేంద్ర ప్రభుత్వ ప్రతినిధులు ఉంటారు. అంతరిక్ష రంగంలో ప్రైవేటు వ్యక్తులు, సంస్థలను ప్రోత్సహించేందుకు ఇది జాతీయ స్థాయిలో నోడల్ ఏజెన్సీగా పనిచేస్తుంది.

ఇదీ చదవండి-అంతరిక్ష పోటీలో ప్రైవేటు భాగస్వామ్యం పాత్ర ఏంటి?