PDF Malware : యూజర్ల పాస్వర్డ్లు, తదితర వ్యక్తిగత డేటా లక్ష్యంగా సైబరాసురులు దాడులకు తెగబడుతున్నారు. ఈ మధ్య కాలంలో ఇలాంటి సైబర్ దాడులు ఎక్కువైపోయాయి. యూజర్లకు తెలియకుండానే వారి డివైజ్లను తమ అధీనంలోకి తీసుకుంటున్నారు. ఇందుకోసం రకరకాల మార్గాలను ఎంచుకుంటున్నారు హ్యాకర్లు. అందులో ముఖ్యంగా మాలిషియస్ సాఫ్ట్వేర్ (మాల్వేర్) యూజర్ల డివైజ్లలోకి పంపించడానికి పీడీఎప్ ఫైళ్లను తరచూగా ఉపయోగించుకుంటున్నారు. ఈ మేరకు ప్రముఖ సైబర్ సెక్యూరిటీ సంస్థ పాలో ఆల్టో నెట్వర్క్స్ తమ తాజా నివేదికలో వెల్లడించింది.
సైబర్ నేరగాళ్లు.. యూజర్లకు అనుమానం రాకుండా కొన్ని ట్రిక్స్ ఉపోయోగిస్తారని తెలిపింది. అందులో భాగంగా 'invoice_MAR_7291565.pdf' , 'Updated Salary' లాంటి పేర్లతో మెయిల్స్ పంపిస్తారని చెప్పింది. ఇలాంటి ఫైల్స్లో యూఆర్ఎల్ లింక్స్ లేదా కొన్ని బటన్స్ పొందుపర్చుతారని.. వాటిపై క్లిక్ చేస్తే వేరే మాలిషియస్ వెబ్సైట్కు రీడైరెక్ట్ అవుతామని పేర్కొంది. అలా రీడైరెక్ట్ అయిన వెబ్సైట్లో.. యూజర్లు ఏదైనా లింక్స్ లేదా బటన్లపై క్లిక్ చేస్తే.. వారి డివైజ్లు నేరగాళ్ల నియంత్రణలోకి వెళ్లిపోతాయి.
నివేదిక ప్రకారం.. 2021తో పోలిస్తే ఇలాంటి సైబర్ దాడుల ముప్పు 55 శాతం పెరిగింది. భద్రత పరంగా పటిష్ఠంగా ఉన్న linux లాంటి ఆపరేటింగ్ సిస్టమ్లపై కూడా సైబర్ దాడుల ప్రభావం పడుతోంది. ఈ మాల్వేర్లు క్లౌడ్ వర్క్లోడ్ డివైజ్లు, ఎనర్జీ, రవాణా, తయారీ, హెల్త్కేర్ రంగాల ఓటీ (ఆపరేషనల్ టెక్నాలజీ) సిస్టమ్లే లక్ష్యంగా దాడులు కొనసాగిస్తున్నాయి.
ఆర్టిఫీషియల్ ఇంటెలిజెన్స్తో ముప్పు పొంచి ఉందని ఆందోళనలు వ్యక్తమవుతున్నప్పటికీ.. సైబర్ నేరగాళ్లలో ఈ సాంకేతికత ఉపయోగం అంతగా పెరగలేదని నివేదిక తెలిపింది. అయితే, ఏఐ సంబంధిత మోసాల్లో పెరుగుదల ఉందని వెల్లడించింది. చాట్జీపీటీ లాంటి డొమైన్ పేర్లను పోలిన వెబ్సైట్లను రూపొందించి.. వాటి ద్వారా సైబర్ దాడులకు తెగబడుతున్నారని.. ఇలాంటి దాడుల్లో 17,818 శాతం పెరుగుదల కనిపించిందని నివేదిక పేర్కొంది. చాట్ బాట్ల వినియోగం పెరగడం.. యాడ్వేర్, స్పైవేర్, అవాంఛిత ప్రోగ్రామ్స్ లాంటి గ్రేవేర్ ఆవిర్భానికి దారి తీసిందని పేర్కొంది.
అయితే, అడల్ట్, ఫైనాన్సియల్ సేవల వెబ్సైట్లు తరచూ చూసేవారిని.. కొత్త నకిలీ సైట్లు క్రియేట్ చేసి టార్గెట్ చేస్తున్నారు. వీటి ద్వారా ఫిషింగ్ (సున్నితమైన డేటాను దోచుకునే టెక్నిక్), సోషల్ ఇంజినీరింగ్ (యుజర్ల డివైజ్పై నియంత్రణ సాధించడం), మాల్వేర్ను వ్యాప్తి చేయడం లాంటి చర్యలకు పాల్పడతారు సైబర్ నేరస్థులు. దీని కారణంగా ఆయా సంస్థలు ప్రతి దశలో పటిష్ఠమైన భద్రత ఏర్పరచుకోవాలని పాలో ఆల్టో నెట్వర్క్స్ చీఫ్ సెక్యూరిటీ ఆఫీసర్, వైస్ ప్రెసిడెంట్ సీన్ డుకా సూచించారు.
PDF Malware Safety Measures : అయితే, వివిధ వెబ్సైట్ల నుంచి పీడీఎఫ్ ఫైళ్లు డౌన్లోడ్ చేస్తున్నప్పుడు, మెయిల్ అటాచ్మెంట్లు వచ్చినప్పుడు ఈ జాగ్రత్తలు కచ్చితంగా పాటించాలి.
- పీడీఎఫ్ ఫైళ్లలో మాల్వేర్ ఉంటుంది. అది మన డివైజ్లకు హాని కలిగిస్తుంది. కాబట్టి డౌన్లోడ్ చేసిన పీడీఎఫ్ ఫైళ్లను ఓపెన్ చేసేముందు.. మంచి యాంటీ వైరస్ సాఫ్ట్వేర్తో స్కాన్ చేయడం మరిచిపోవద్దు.
- మీరు ఏదైనా పీడీఎఫ్ డౌన్లోడ్ చేయాలనుకుంటే.. నమ్మకమైన వెబ్సైట్ల నుంచి డౌన్లోడ్ చేసుకోవాలి. గుర్తింపు కలిగిన, అధికారిక వెబ్సైట్ల నుంచి డౌన్లోడ్ చేసుకోవాలి. ఇలా చేస్తే నకిలీ సైట్ల నుంచి పొంచి ఉన్న రిస్క్ తగ్గుతుంది.
- పీడీఎఫ్ ఫైళ్లలో లింక్స్ ఉంటాయి. వాటిని క్లిక్ చేయొద్దు. ఒకవేళ ఆ పీడీఎఫ్ ఫైల్ నమ్మకమైన వెబ్సైట్ నుంచి డౌన్లోడ్ చేస్తే తప్ప.
- కొన్ని వెబ్సైట్లలో పీడీఎఫ్ డౌన్లోడ్ చేసేటప్పుడు.. లింక్స్, పాప్ అప్ యాడ్స్ వస్తాయి. అయితే, అలాంటి వాటిలో మాలిషియస్ కంటెంట్ ఉంటుంది. సైబర్ నేరగాళ్లు యూజర్లకు గాలం వేయడానికి ఇలాంటి ట్రిక్స్ ఉపయోగిస్తారు. అలాంటివి కనిపించినప్పుడు క్లిక్ చేయకుండా ఉండటమే మంచిది.
- మీ వ్యక్తిగత సమాచారం అడిగినా, వేరే వెబ్సైట్కు రీడైరెక్ట్ చేసినా.. అలాంటి పీడీఎఫ్ ఫైళ్లతో జాగ్రత్తగా ఉండాలి. లేకపోతే మీ సమాచారం చోరీకి గురయ్యే ప్రమాదం ఉంది. మీరు ఏదైనా సమాచారం వెబ్సైట్కు ఇవ్వాలనుకుంటే.. ఆ సైట్ యూఆర్ఎల్ను నిశితంగా పరిశీలించండి. ఇలాంటి ఫిషింగ్ దాడుల వల్ల ఆర్థికంగా నష్టపోయే అవకాశం ఉంది. చివరగా.. మీ డివైజ్ సాఫ్ట్వేర్ను ఎప్పటికప్పుడు అప్డేట్ చేసుకోండి.
- ఇవీ చదవండి :
- ఐఓటీని వదలని మాల్వేర్ భయాలు.. మైక్రోసాఫ్ట్ పరిశోధనలో వెల్లడి..
- ఆండ్రాయిడ్ యూజర్స్ జరభద్రం.. ఈ యాప్స్ మీ ఫోన్లో ఉన్నాయా?.. వెంటనే అన్ఇన్స్టాల్ చేయండి!
