దేశంలో రానున్న ఐదేళ్లలో డిజిటల్ ఉద్యోగాలకే డిమాండ్ అధికమని అమెజాన్ వెబ్సర్వీసెస్ అభిప్రాయపడింది. 2025 నాటికి ప్రస్తుతమున్న 2.5 కోట్ల డిజిటల్ నైపుణ్య ఉద్యోగుల సంఖ్య తొమ్మిది రెట్లు పెరగాలని పేర్కొంది. కార్మిక బలగంలోని 69 శాతం మందికి డిజిటల్ నైపుణ్యాలు కల్పించాలని, ఈ మేరకు నైపుణ్య శిక్షణ కార్యక్రమాలు నిర్వహించాలని సూచించింది ఆసియా పసిఫిక్ దేశాలతో పోల్చితే దేశంలో డిజిటల్ నిపుణులైన ఉద్యోగుల సంఖ్య తక్కువగా ఉంది. భారత్లో అత్యల్పంగా 12 శాతం మందికే నైపుణ్యముంది. భవిష్యత్తు టెక్నాలజీలపై పనిచేస్తున్నవారి సంఖ్యా తక్కువే. దేశంలోని 3500పైగా ఇంజినీరింగ్‌ కళాశాలల నుంచి లక్షలాది మంది ఇంజినీరింగ్‌ పట్టాలతో బయటకు వస్తున్నారు. కానీ వీరిలో 90 శాతం మందికి సాఫ్ట్వేర్ ప్రోగ్రామ్స్‌ మీద పనిచేసేంత నైపుణ్యాలు ఉండటం లేదని సర్వేలో వెల్లడైంది. విద్యా సంస్థలు, పరిశ్రమలకు మధ్య సంబంధాలు, సరైన అవగాహన లేకపోవడం ప్రధాన లోపంగా పేర్కొంది.
ఈ రంగాల్లో ముందుకెళ్లాలి...
సాఫ్ట్వేర్ ఆపరేషన్స్‌
ఇన్ఫర్మేషన్‌ - డేటా లిటరసీ
డిజిటల్ కంటెంట్‌ - తయారీ
క్లౌడ్‌ కంప్యూటింగ్
డిజిటల్ కమ్యూనికేషన్స్‌
డిజిటల్ సమస్యల పరిష్కారం
డిజిటల్ భద్రత - విలువలు
డిజిటల్ ప్రాజెక్టు నిర్వహణ
ఈ సంస్కరణలు అవసరం..
డిజిటల్ కార్మికులకు మరిన్ని నైపుణ్యాలు పెంచుకునేందుకు అవకాశం కల్పించాలి. నాన్‌ టెక్నికల్‌ రంగాల్లో డిజిటల్ ఉద్యోగ అవకాశాలు కల్పించాలి.
ఇంటర్మీడియట్‌ స్థాయి వరకు విద్యార్థుల్లో సైన్స్, గణితం సబ్జెక్టులు, డిజిటల్ స్కిల్స్‌లో నైపుణ్యం పెంచేలా పాఠ్యప్రణాళిక రూపొందించాలి. ఉన్నత విద్యలో పరిశ్రమలతో విద్యా సంస్థల భాగస్వామ్యానికి ప్రాధాన్యమివ్వాలి.
సాంకేతికేతర రంగాల్లో డిజిటల్ టెక్నాలజీని ఉపయోగించేలా విధానాలు రూపొందించాలి. అందుకు అవకాశాలు కల్పించే పరిశ్రమల యాజమాన్యాలకు ప్రోత్సాహకాలు ప్రకటించాలి.
నిరుద్యోగులు, మహిళలు, యువతకు డిజిటల్ శిక్షణ లక్ష్యంగా శిక్షణ కార్యక్రమాలు చేపట్టాలి. పరిశ్రమల్లో అప్రెంటీస్‌ అవకాశాలు పెంచి, కార్మిక బలగంలోకి తీసుకురావాలి.
ఆ ఐదు రంగాలు కీలకం..
భవిష్యత్తు టెక్నాలజీలు కీలకంగా మారనున్నాయి. దేశంలోని 76 శాతం మంది డిజిటల్ నిపుణులు 2025 నాటికి క్లౌడ్‌ కంప్యూటింగ్‌లో మెలకువలు సాధించాలి. క్లౌడ్‌ ఆర్కిటెక్చర్‌ డిజైన్, సాఫ్ట్వేర్ ఆపరేషన్స్‌ సపోర్టు, వెబ్‌సైట్‌/ గేమ్‌ / సాఫ్ట్వేర్ డెవలప్‌మెంట్, డేటా సైన్స్, సైబర్‌ సెక్యూరిటీ రంగాల్లో అపారమైన అవకాశాలు లభించనున్నాయి. అడ్వాన్స్డ్‌ క్లౌడ్‌ కంప్యూటింగ్, డేటా స్కిల్స్‌ రంగాల్లో ఉద్యోగాల డిమాండ్ మూడింతలు పెరుగుతుంది. కొత్త సాఫ్ట్వేర్, హార్డ్‌వేర్‌ నిర్వహణ సామర్థ్యం, బేసిక్‌ టూల్స్ వినియోగాన్ని పెంచాలని, విద్యారంగంలో డిజిటల్ రక్షణ అభివృద్ధి, సైబర్‌ ఫోరెన్సిక్‌ టూల్స్, సాఫ్ట్వేర్ రంగాలపై నైపుణ్య శిక్షణ అవసరమని నివేదిక తెలిపింది.
