బిడ్డ మనసుని అమ్మకాక మరెవరు అర్థం చేసుకుంటారు! మానసిక వైకల్యంతో బాధపడుతున్న తన బిడ్డలాంటి మరెందరో బిడ్డలకోసం ఆమె ఒక ప్రత్యేకమైన పాఠశాలని ఏర్పాటుచేశారు. ఆమెతోపాటు కుటుంబం మొత్తం ఈ యజ్ఞంలో పాల్గొనడం విశేషం...
తూర్పుగోదావరి జిల్లాకు చెందిన వైవీఎస్‌ఎస్‌ జయలక్ష్మికి ఇద్దరు పిల్లలు. రెండో సంతానం సింధూరి. తను పుట్టుకతో మైక్రోసెఫలిస్‌ వ్యాధికి గురైంది. నాలుగేళ్ల వయసొచ్చే వరకూ ఒక్క మాటా మాట్లాడలేదు. పాఠశాలలో చేర్పిస్తే మార్పు వస్తుందేమో అనుకున్నారు. కానీ పిచ్చి పిల్లని చేర్చుకోమంటూ వాళ్లు ఇచ్చిన కఠినమైన సమాధానం ఆ తల్లి మనసుని తీవ్రంగా గాయపరిచింది. కొన్నాళ్లు ఆ బాధనుంచి తేరుకోలేకపోయారు. తర్వాత ఎంతో వెతగ్గా రాజమండ్రిలో ప్రత్యేక పాఠశాల ఉందని తెలుసుకుని అందులో చేర్చారు. అక్కడి టీచర్ల బృందం ప్రయోగాలు ఫలించి సింధూ తొలిసారి ‘అమ్మా’ అని పిలిచింది. ఏళ్ల నుంచి ఆ పిలుపు కోసమే ఎదురుచూస్తున్న జయలక్ష్మికి పట్టలేని సంతోషం కలిగింది. ఆ ఉత్సాహంతో తనూ స్పెషల్‌ ఎడ్యుకేషన్‌లో డిప్లొమా చేసి అదే పాఠశాలలో టీచరుగా చేరారు. అప్పటికీ సింధూరికి సాధారణ స్కూల్‌లో సీటు దొరకలేదు. ఇదంతా చూసి ఇలాంటి పిల్లల కోసం ఏదైనా చేయాలనుకున్నారు జయలక్ష్మి.
ఇంట్లోనే శిక్షణ....
తన కుమార్తెతో పాటు మానసిక దివ్యాంగుడైన పొరుగింటి అబ్బాయికి కూడా ఇంట్లోనే శిక్షణ ప్రారంభించారు. ఈ విషయం చుట్టుపక్కల ఊళ్లకూ పాకింది. దీంతో ప్రత్యేక అవసరాల పిల్లలను ఇక్కడ చేర్పించడం మొదలుపెట్టారు. కొద్దికాలంలోనే వారి సంఖ్య 40కి చేరుకుంది. దీన్ని వ్యవస్థీకృతం చేయాలని 2012లో గుంటూరు నవభారత్‌ నగర్‌లో ‘ప్రభాత సింధూరి పాఠశాల’ని ఏర్పాటు చేశారు. ఇక్కడ ఇప్పుడు 65 మంది శిక్షణ పొందుతున్నారు. ఉదయం 9 గంటలకు యోగాతో పాఠశాల ప్రారంభమవుతుంది. ఏడాది నుంచి 18 ఏళ్ల వయసున్న మానసిక దివ్యాంగులకు ఇక్కడ శిక్షణ ఇస్తున్నారు. ప్రత్యేక బీఈడీ చేసిన టీచర్లు విద్యాబుద్ధులు నేర్పిస్తారు. ఫిజియోథెరపిస్టులతో కసరత్తులు చేయిస్తారు. తమ పనులు తాము సొంతగా చేసుకునేలా ప్రోత్సహిస్తారు. అక్షరాలు, అంకెలు, బొమ్మలు వంటివి గుర్తుపట్టడంలోనూ శిక్షణ ఇస్తారు. సృజనాత్మకత పెంపొందించే స్వయంఉపాధి మార్గాలనూ నేర్పిస్తారు. పిల్లలతో కొవ్వొత్తులు, ప్రమిదలు, క్లాత్‌బ్యాగులు, రాఖీల వంటివి తయారు చేయిస్తారు. శారీరకంగా ఎదుగుదల లేనివాళ్లకు, ఆటిజం పిల్లలకు ఫిజియోథెరపిస్టులతో తర్ఫీదు ఇస్తున్నారు. శిక్షణ అనంతరం ఓపెన్‌స్కూల్‌ ద్వారా పదోతరగతి పరీక్షలు రాయిస్తున్నారు. ఇక్కడ శిక్షణ పొందిన ఎందరో పిల్లలు స్వయం ఉపాధితో తమ కాళ్లపై తామునిలబడ్డారు.