ములుగులో ఘోర రోడ్డు ప్రమాదాలు... ముగ్గురు మృతి

ములుగు జిల్లాలోని పలు రహదారులు నెత్తురోడుతున్నాయి. ఆదివారం ఒక్కరోజే మూడు ప్రమాదాలు జరిగి ముగ్గురు మృతి చెందారు. ఈ ఘటనలతో జిల్లా వాసులు ఉలిక్కిపడ్డారు. రోడ్ల తీరును చూసి భయబ్రాంతులకు గురవుతున్నారు.

ములుగు జిల్లాలో మూడు ఘోర రోడ్డు ప్రమాదాలు చోటు చేసుకున్నాయి. గోవిందరావుపేట మండలం పస్రా సమీపంలో గుర్తుతెలియని వాహనం ద్విచక్రవాహనాన్ని ఆదివారం ఢీకొట్టడంతో కృష్ణారావు అనే వ్యక్తి అక్కడికక్కడే మృతి చెందారు. ఇదే మండలం బుస్సాపూర్ గ్రామానికి చెందిన రామగిరి ... లక్నవరం సరస్సులో పనికోసం ట్రాక్టర్‌లో వెళ్తుండగా గుట్ట దిగుతున్న సమయంలో కిందపడి మృతి చెందారు. గుంతలు గుంతలుగా ఉన్న రోడ్డుపై వెళ్తుండగా ఈ ప్రమాదం జరిగింది.

సాయంత్రం ఐదు గంటల సమయంలో ములుగు మండలం జంగాలపల్లి క్రాస్ రోడ్డు పెట్రోల్ బంకు ఎదురుగా ద్విచక్ర వాహనాన్ని ఇసుక లారీ ఢీకొట్టడంతో గోవిందరావుపేట మండలం పస్రా గ్రామానికి చెందిన అయ్యప్ప స్వామి మాల ధరించిన ఆర్య వర్ధన్ అక్కడికక్కడే మృతి చెందారు. మరొకరికి గాయాలు కావడంతో ములుగు ఏరియా ఆస్పత్రికి తరలించి చికిత్స అందిస్తున్నారు. ములుగు జిల్లాలో ఒక్కరోజే మూడు ఘోర రోడ్డు ప్రమాదాలు జరగడంతో జిల్లా వాసులు రోడ్ల తీరు, ఇసుక లారీలను చూసి భయబ్రాంతులకు గురవుతున్నారు.

ఇదీ చదవండి:కరీంనగర్‌లో ఆయుర్వేద ఆస్పత్రి సీజ్