మెగా కంపెనీ కార్యాలయంలో దొంగతనం.. రూ. 20 లక్షలు చోరీ!

కాళేశ్వరం ప్రాజెక్టు పార్వతి పంప్‌ హౌస్‌ని నిర్మిస్తున్న మెగా కంపెనీ కార్యాలయంలో మంగళవారం అర్ధరాత్రి భారీ చోరీ జరిగింది. ఈ ఘటన ఆలస్యంగా వెలుగులోకి వచ్చింది. అకౌంట్స్ విభాగంలో రూ. 20 లక్షలు గుర్తు తెలియని వ్యక్తులు దొంగిలించినట్లుగా సమాచారం.

పెద్దపల్లి జిల్లా అంతర్గాం మండలం గౌలివాడ సమీపంలోని మెగా కంపెనీ కార్యాలయం అకౌంట్స్ విభాగంలో మంగళవారం అర్ధరాత్రి భారీ చోరీ జరిగిన ఘటన ఆలస్యంగా వెలుగులోకి వచ్చింది. కాళేశ్వరం ప్రాజెక్టు పార్వతి పంప్ హౌస్‌ని నిర్మిస్తున్న ఈ కార్యాలయంలో గుర్తు తెలియని వ్యక్తులు గదిలోని బీరువా పగలగొట్టి రూ. 20 లక్షలను దొంగిలించారు.

బుధవారం ఉదయం కార్యాలయానికి వచ్చిన మెగా కంపెనీ అధికారులు చోరీ జరిగినట్లు తెలుసుకుని పోలీసులకు సమాచారం అందించారు. క్లూస్ టీం సహాయంతో రామగుండం సీఐ ఘటనా స్థలాన్ని పరిశీలించారు.

పంప్ హౌస్‌లో సుమారు 700 మందికి పైగా కార్మికులు పనిచేస్తుండగా వారి వేతనాలు, ఇతర ఖర్చుల కోసం కార్యాలయంలో పెద్ద మొత్తంలో నగదు ఉంచారు. బీరువాలో నగదు ఉన్న విషయం తెలిసిన వ్యక్తుల సహకారంతో ఈ దొంగతనం జరిగి ఉంటుందని పోలీసులు భావిస్తున్నారు. కార్యాలయం వీఆర్వో ఫిర్యాదు మేరకు కేసు నమోదు చేసి విచారణ జరుపుతున్నారు.

ఇదీ చదవండి:ప్రేమ వివాహం వల్ల 2 కుటుంబాల ఘర్షణ... ఒకరు మృతి