విద్యార్థినిపై అత్యాచారయత్నం చేసిన టీచర్​ అరెస్ట్​

విద్యాబుద్ధులు నేర్పించాల్సిన గురువే, సభ్యసమాజం సిగ్గుపడేలా వ్యవహరించాడు. పరీక్షల్లో సహాయం చేస్తానంటూ పదో తరగతి విద్యార్థిని పై అత్యాచారాయత్నానికి ఒడిగట్టాడు. ఫలితంగా ఉన్నతాధికారులు ఆగ్రహం వ్యక్తం చేసి సస్పెన్షన్ వేటు వేశారు. ఈ విషయాన్ని గోప్యంగా దాచిపెట్టిన సూర్యాపేట జిల్లా విద్యాధికారికి కలెక్టర్​ అమోయ్ కుమార్ షోకాజు నోటీసు పంపించారు.

సూర్యాపేట మండలం పాండు నాయక్ తండా పాఠశాలకు చెందిన కటకం నరసింహ స్వామి ఇటీవల ప్రారంభమైన పదోతరగతి పరీక్షకు ఇన్విజిలేషన్ విధులు నిర్వహిస్తున్నాడు. తాను విధులు నిర్వహిస్తున్న కేంద్రంలో పరీక్ష రాస్తున్న ఓ బాలికకు సహాయం చేస్తానని నమ్మించి విద్యానగర్​లో ఉండే యూనియన్ కార్యాలయానికి తీసుకెళ్ళాడు. అక్కడ ఎవరులేకపోవటంతో విద్యార్థినిపై అత్యాచారయత్నానికి పాల్పడ్డాడు. ఎలాగో తప్పించుకున్న విద్యార్ధిని తన సంరక్షకురాలైన పెద్దమ్మకు చెప్పి బోరున విలపించటంతో పోలీసులకు ఫిర్యాదు చేశారు. విషయం తెలుసుకున్న విద్యాశాఖ అధికారులు 100 నెంబర్​కు వచ్చిన బాధితుల ఫిర్యాదు జాబితా ఆధారంగా ఉపాధ్యాయుడిపై చర్యలు తీసుకున్నారు. సదరు ఉపాధ్యాయున్ని సస్పెండ్ చేశారు. బాలికపై జరిగిన అత్యాచారయత్నం జరిగిన సమాచారాన్ని కలెక్టర్​కు అందించని కారణంగా డీఈవో మదన్ మోహన్​కు షోకాజ్ నోటీసు జారీ చేశారు.

ఫిర్యాదు రాలేదని సాకులు చెప్పిన పోలీసులు ఎట్టకేలకు అరెస్టు చేశారు. ఫిర్యాదుపై క్షణాల్లో వాలిపోయే పోలీసులు ఇంత పెద్ద నేరం జరిగినప్పటికీ కేసు నమోదు చేయడంలో జాప్యం చేశారన్న ఆరోపణలు వినపడుతున్నాయి.

ఇవీ చూడండి: ఈతకు వెళ్ళిన చిన్నారులు... విగతజీవులైనారు