'చమురు రంగంలో 100 బిలియన్​ డాలర్ల పెట్టుబడులు'

భారత్​ వేగంగా అభివృద్ధి చెందుతున్న దేశమని ప్రధాని నరేంద్రమోదీ ఉద్ఘాటించారు. సౌదీ అరేబియా పర్యటనలో భాగంగా రియాద్​లో జరిగిన విదేశీ పెట్టుబడుల సదస్సులో ఆయన ప్రసంగించారు. ఐదేళ్లలో చమురు రంగంలో 100 బిలియన్​ డాలర్ల పెట్టుబడులు పెట్టనున్నట్లు స్పష్టం చేశారు.

భారత్​ పెట్టుబడులకు స్వర్గధామమని ప్రధాని నరేంద్రమోదీ ఉద్ఘాటించారు. సౌదీతో అనుబంధం ఏళ్లనాటిదని.. రెండు దేశాల మధ్య దృఢమైన వ్యూహాత్మక భాగస్వామ్యం ఉందని స్పష్టం చేశారు.

సౌదీ అరేబియా పర్యటనలో భాగంగా రియాద్​లో జరిగిన విదేశీ పెట్టుబడుల సదస్సులో ఆయన ప్రసంగించారు. ఈ సదస్సునే "దావోస్​ ఇన్​ డిజర్ట్​"గా పిలుస్తారు.

"అంకురసంస్థ నిర్వహణలో ప్రపంచంలో భారత్​ 3వ స్థానంలో ఉంది. భారత్​లోని 2,3 స్థాయి నగరాల్లోనూ అంకురసంస్థలు వచ్చాయి. ప్రపంచ స్థాయిలో ఇవి పెట్టుబడులు పెడుతున్నాయి. వీటిల్లో పెట్టుబడులు పెట్టి మీరు లాభం పొందాలని ప్రపంచాన్ని ఆహ్వానిస్తున్నా.

భారత్​లో గ్యాస్​, చమురు రంగంలో భారీగా పెట్టుబడులు పెడుతున్నాం. 2024 వరకు చమురు శుద్ధి, పైప్​లైన్స్, గ్యాస్​ టెర్మినళ్ల కోసం 100 బిలియన్ డాలర్లు సమకూర్చనున్నాం. సౌదీ ఆరాంకో పశ్చిమ తీర రిఫైనరీల్లో పెట్టుబడులు పెట్టనుండటం సంతోషంగా ఉంది. ఈ శుద్ధి కేంద్రం ఆసియాలోనే అతిపెద్దది కానుంది."

-నరేంద్రమోదీ, ప్రధాన మంత్రి

ప్రపంచంలో మూడో అతిపెద్ద ఇంధన వినియోగదారు అయిన భారత్​.. 83శాతం దిగుమతులపైనే ఆధారపడుతోందని మోదీ పేర్కొన్నారు. ఇందుకోసం మౌలిక సదుపాయాలను సమకూర్చుకునే దిశగా భారత్​ కృషి చేస్తోందని తెలిపారు.

సంబంధాల్లో నైపుణ్యమూ భాగమే..

స్కిల్​ ఇండియా ద్వారా 40 కోట్లమందికి శిక్షణ ఇవ్వనున్నట్లు ప్రధాని స్పష్టం చేశారు. దీని ద్వారా భారత్​లో ప్రారంభించబోయే అంకుర సంస్థల్లో మానవ వనరుల కొరత తీరుతుందని తెలిపారు. అంతర్జాతీయ సంబంధాలు కేవలం వస్తువుల వరకు మాత్రమే పరిమితం కావద్దని.. మానవ వనరులు, నైపుణ్యం అందులో అంతర్గతం కావాలని ఆకాంక్షించారు.

'మంచి మార్పుకు ఐరాస కృషి చేయాలి'

పెట్టుబడుల సదస్సులో భాగంగా బ్రిడ్జ్​వాటర్​ అసోసియేట్స్​ సహ ఛైర్మన్​ రే దలియోతో విస్తృతంగా చర్చించారు మోదీ. ఐరాస లాంటి అంతర్జాతీయ సంస్థలు సకారాత్మక మార్పులు తెచ్చేందుకు ప్రయత్నించాలని ఆకాంక్షించారు. కానీ కొంతమంది ఐరాసను సంస్థగా కాకుండా ఓ సాధనంగానే చూస్తున్నారని దేశం పేరు ప్రస్తావించకుండా విమర్శించారు.

"కొంతమంది శక్తిమంతమైన వ్యక్తులు ఐరాసను సాధనంగా మాత్రమే పరిగణిస్తున్నారు. సంస్థగా గుర్తించటం లేదు. కొంతమంది చట్టం, నిబంధనలను పాటించట్లేదు. మరికొంత మంది అవే చట్టాల కింద నలిగిపోతున్నారు. ప్రపంచమంతా చట్టానికి కట్టుబడి ఉండాలి."

-నరేంద్రమోదీ, ప్రధానమంత్రి

వివాదాల పరిష్కారాల్లో ఐరాస ఏ మేరకు కృషిచేస్తోందని సర్వసభ్య సమావేశంలో ప్రశ్నించానని.. అయితే దీనిపై సరైన చర్చ జరగలేదని మోదీ తెలిపారు. ఐరాస వజ్రోత్సవాల సమయంలోనైనా ఈ అంశం ప్రస్తావనకు రావాలని ఆశించారు.

ఐరాస భద్రతామండలిలో జీ-4 దేశాలైన భారత్​, బ్రెజిల్, జర్మనీ, జపాన్​కు శాశ్వత సభ్యత్వం ఇవ్వాలని ఎప్పటినుంచే డిమాండ్​ ఉందని గుర్తుచేశారు. అయితే దిశగా ఎలాంటి స్పందన లేదని ఆక్షేపించారు.

యువరాజుతో భేటీ

అంతకుముందు సౌదీ యువరాజు మహ్మద్​ బిన్​ సల్మాన్​తో భేటీ అయ్యారు మోదీ. ఈ సమావేశంలో ఉగ్రవాదంపై ఉమ్మడి పోరు సాగించాలని తీర్మానించారు ఇరు నేతలు. ద్వైపాక్షిక భద్రతా సహకారాన్ని పెంపొందించుకునే ప్రతిపాదనకు ఆమోదం తెలిపారు.

ఇదీ చూడండి: పాక్​ను సుతిమెత్తగా హెచ్చరించిన ఐసీఏఓ