ఇరాన్- అమెరికా మధ్య తీవ్ర ఉద్రిక్తత పరిస్థితులు నెలకొన్న తరుణంలో తాజాగా ఇరాన్ టెహ్రాన్ అణు ఒప్పందానికి తూట్లు పొడిచేందుకు సిద్ధమైంది. ఒప్పందంలో విధించిన యురేనియం నిల్వల పరిమితిని 10 రోజుల్లో పెంచుతున్నట్లు ప్రకటించింది. ఇరాన్ అణుశక్తి విభాగం ప్రతినిధి కామల్వండి ఈ ప్రకటన చేశారు.
ఒమన్ సమీపంలోని రెండు చమురు నౌకలపై ఇటీవల దాడి జరిగిన సంగతి తెలిసిందే. ఈ దాడికి ఇరాన్దే బాధ్యత అంటూ అగ్రరాజ్యం నిందిస్తోంది. ఈ ఆరోపణలను తీవ్రంగా ఖండించింది ఇరాన్.
తమపై ఉన్న ఆంక్షలను ఎత్తివేయకపోతే 2015 అణు ఒప్పందంలోని కొన్ని అంశాలను ఉల్లంఘిస్తామని... పరిమితికి మించి యురేనియం నిల్వ చేస్తామని గతంలోనే హెచ్చరించింది. హెచ్చరిక ప్రకారం 10 రోజుల్లో పరిమితికి మించి యురేనియంను నిల్వ చేస్తామని ప్రకటించింది ఇరాన్.
అణు విద్యుత్ కేంద్రాల కోసం యురేనియం అవసరమని.. కనుక ఒప్పందం ఉల్లంఘిస్తున్నామని తెలిపింది.
ఇదీ నేపథ్యం?
ఇరాన్ వివాదాస్పద అణు కార్యక్రమాలను ఆపేలా 2015లో ఒప్పందం కుదిరింది. ఈ ఒడంబడికలో అమెరికాతో పాటు బ్రిటన్, ఫ్రాన్స్, రష్యా, చైనా, జర్మనీ భాగస్వాములు. ఒప్పందం ప్రకారం.. ఇరాన్ అణు కార్యక్రమాలపై పరిమితులు విధించారు. వాటికి లోబడి ఇరాన్ వ్యవహరిస్తే ఆ దేశంపై అంతర్జాతీయంగా ఉన్న ఆంక్షలను ఎత్తివేస్తామని హామీ ఇచ్చారు.
అమెరికా అధ్యక్షుడిగా డొనాల్డ్ ట్రంప్ ఎన్నికయ్యాక ఒప్పందంపై అభ్యంతరాలు వ్యక్తం చేశారు. ఇదో చెత్త ఒప్పందమంటూ గతేడాది వైదొలిగిన అమెరికా... ఇరాన్పై ఆంక్షలను పునరుద్ధరించింది. ఈ చర్య ఇరాన్ ఆర్థిక వ్యవస్థకు పెద్ద దెబ్బగా మారింది. ఈ ఏకపక్ష చర్యపై ఇరాన్ అభ్యంతరం తెలిపింది. ఒప్పందానికి లోబడి వ్యవహరించినా... ఆంక్షలు పునరుద్ధరించటాన్ని వ్యతిరేకించింది.
