ఒక్క పెళ్లి చేసుకోవడానికే నానా తంటాలు పడుతుంటారు కొద్దిమంది. వివాహాలు కాక 'పెళ్లి కాని ప్రసాద్'లుగా మిగిలిపోయిన వారు ఎంతో మంది ఉన్నారు. కానీ ఈయన మాత్రం అందుకు విరుద్దం. ఒకటి.. రెండు.. కాదు ఏకంగా 105 వివాహాలు చేసుకుని.. గిన్నిస్ బుక్ ఆఫ్ రికార్డ్సులో స్థానం సంపాదించుకున్నాడు. ఏంటీ.. 105 పెళ్లిళ్లా? అసలు అన్ని వివాహాలు ఎలా చేసుకున్నాడని ఆశ్చర్యపోతున్నారా? అయితే అతడి గురించి తెలుసుకోండి!
అమెరికాకు చెందిన జియోవన్నీ విజ్లియొట్టో అనే వ్యక్తి 1949 నుంచి 1981 మధ్య 105 మంది మహిళలను పెళ్లి చేసుకున్నాడు. ఇందులో విచిత్రం ఏంటంటే.. ఇప్పటివరకు పెళ్లి చేసుకున్న 105 మందిలో ఏ మహిళకు కూడా విడాకులు ఇవ్వలేదు. దీంతో అత్యధిక వివాహాలు చేసుకున్న వ్యక్తిగా గిన్నిస్ బుక్ ఆఫ్ రికార్డ్సులో స్థానం సంపాదించుకున్నాడు. విజ్లియొట్టో 105 మంది మహిళలను మోసం చేసే పెళ్లి చేసుకున్నాడు. ప్రతిసారి పేరు మార్చుకుని.. దొంగ ఆధారాలతో వివాహం చేసుకున్నాడు. మార్కెట్లలోని మహిళలను ఎక్కువగా పెళ్లి చేసుకున్న విజ్లియొట్టో.. వారిని కలిసిన తొలిరోజే ప్రపోజ్ చేసేవాడు. అనంతరం మహిళలను నమ్మించి పెళ్లి చేసుకుని.. వారి నగదు, ఆభరణాలతో పారిపోయేవాడు. ఎత్తుకెళ్లిన వస్తువులను విక్రయించి.. కొత్త వ్యక్తుల కోసం వెతికేవాడు. ఇలా విజ్లియొట్టో ఇప్పటివరకు అమెరికాలోని 27 రాష్ట్రాలు, 14 వివిధ దేశాలకు చెందిన మహిళలను పెళ్లి చేసుకున్నాడు. అతడు పెద్ద మోసగాడని.. జియోవన్నీ విజ్లియొట్టో ఇది కూడా అతడి అసలు పేరు కాదని బాధితులు ఆరోపిస్తున్నారు.
105 మందిని మోసం చేసి పెళ్లి చేసుకున్న విజ్లియొట్టో.. చివరి భార్యకు చిక్కాడు. శారోన్ క్లార్క్ అనే మహిళ.. ఇతడి మోసాన్ని బయటపెట్టింది. ఆమెను మోసం చేసి పారిపోగా.. అతడిని వెతికి మరీ ఫ్లోరిడాలో పట్టుకుని పోలీసులకు అప్పగించింది క్లార్క్. అతడు 53 ఏళ్ల వయసులో ఉన్నప్పుడు.. 1981 డిసెంబర్ 28న పోలీసులు అదుపులోకి తీసుకున్నారు. మోసం, దొంగతనం కేసుల కింద అతడిని అరెస్ట్ చేసి న్యాయస్థానంలో ప్రవేశపెట్టారు.