Russia Ukraine Crisis: ఉక్రెయిన్‌పై విరుచుకుపడుతున్న రష్యా సేనలు.. క్రమంగా అక్కడి ప్రాంతాలను స్వాధీనం చేసుకుంటున్నాయి. లుహాన్స్క్‌ ప్రావిన్స్‌ ఆక్రమణే లక్ష్యంగా.. ముందుకు సాగుతున్న మాస్కో సేనలు పూర్తిగా ఆ ప్రాంతంపై పట్టుబిగిస్తున్నాయి. ఇందులో భాగంగా ఉక్రెయిన్ బలగాల చేతిలో ఉన్న చివరి లుహాన్స్క్‌ ప్రావిన్స్‌ నగరం లిసిచాన్స్క్‌ సైతం రష్యా అధీనంలోకి తెచ్చుకుంది. ఈ విషయాన్ని రష్యా రక్షణ మంత్రి సెర్గీ షోయిగు వెల్లడించారు. తమ బలగాలు లిసిచాన్స్క్‌ నగరంపై పట్టుసాధించాయని పేర్కొన్నారు. ఈ విజయంతో డాన్‌బాస్‌ ప్రాంతాన్ని ఆక్రమించుకోవాలన్న.. తమ లక్ష్యానికి మరింత చేరువ అయ్యామని అభిప్రాయపడ్డారు.
రష్యా దాడులను ఉక్రెయిన్ తీవ్రంగా ప్రతిఘటిస్తోంది. మాస్కో సేనల అధీనంలోని మెలిటోపొల్ నగరంపై విరుచుకుపడింది. మెలిటోపొల్‌లోని రష్యా శిబిరంపై 30కి పైగా దాడులు జరిపినట్లు బహిష్కరణకు గురైన ఆ ప్రాంత మేయర్ ఇవాన్ ఫెడోరోవ్ తెలిపారు. మెలిటోపొల్ పౌరుల శాంతియుత జీవనాన్ని పునరుద్ధరించేందుకు ఉక్రెయిన్ సేనలు ఏమైనా చేస్తాయని ఆయన స్పష్టం చేశారు.