Man Sentenced To 240 Years In Prison :అమెరికాలో ఇద్దరిని కాల్చి చంపిన ఓ వ్యక్తికి అక్కడి కోర్టు 240 సంవత్సరాలు జైలుశిక్ష విధించింది. ఈ మేరకు బుధవారం సంచలన తీర్పును వెలువరించింది.2022 ఏప్రిల్లో కెంటకీలోని సదరన్ ఇండియానా గ్యాస్ స్టేషన్లో ఓ వ్యక్తి ఇద్దరిని కాల్చి చంపాడు. ఈ కేసులో కోర్టు ఈ తీర్పును ఇచ్చింది.
చెరోక్ అమీర్ డగ్లస్ అనే వ్యక్తి ఓ గ్యాస్ స్టేషన్లో తన భార్య బ్రాండీకే డగ్లస్ను(38), అక్కడ ఉన్న కస్టమర్ ఎం యెల్లే(43) అనే వ్యక్తిని కాల్చి చంపాడు. దీంతో నిందితుడిని అదుపులోకి తీసుకోవడానికి పోలీసులు ప్రయత్నించారు. అప్పుడు నిందితుడు ఓ హోటల్లోకి పారిపోయాడు. ఈ క్రమంలో ఆ హోటల్ యజమాని విన్నీ వెన్ను బెదిరించి కారులో బంధించేందుకు యత్నించాడు. ఆ సమయంలో ఆమె కారు నుంచి కిందపడడం వల్ల గాయాలయ్యాయి. అనంతరం పోలీసులు నిందితుడిని అరెస్ట్ చేశారు.
అయితే.. నిందితుడికి, ఆయన భార్యకు మృతుడు యెల్లేతో ఎటువంటి సంబంధం లేదని దర్యాప్తు అధికారులు తేల్చారు. ఘటన జరిగిన సమయంలో యేల్ గ్యాస్ స్టేషన్ వద్దకు వెళ్తుండగా నిందితుడు అతడిపై కాల్పులు జరిపాడని పేర్కొన్నారు. ఈ క్రమంలో దర్యాప్తు నివేదికను న్యాయస్థానానికి సమర్పించారు.