Van Falls Into Ditch in Pakistan: పాకిస్థాన్లో ఘోర ప్రమాదం జరిగింది. ఓ వ్యాను లోయలోకి దూసుకెళ్లగా.. మహిళలు, చిన్నారులు సహా మొత్తం 10 మంది మరణించారు. మరో 16 మందికి గాయాలయ్యాయి. ఖైబర్ పఖ్తుంఖ్వాలోని పర్వత ప్రాంతాల్లో జరిగిందీ ఘటన. మార్దాన్ జిల్లా నుంచి అప్పర్ డిర్ జిల్లాలోని కాల్కోట్వైపు వెళ్తుండగా మూలమలుపు వద్ద వాహనం అదుపుతప్పి లోయలో పడిపోయిందని అధికారులు తెలిపారు.
మృతుల్లో ముగ్గురు మహిళలు, ఇద్దరు చిన్నారులు ఉన్నట్లు అధికారులు వెల్లడించారు. క్షతగాత్రుల పరిస్థితి కూడా విషమంగా ఉందని చెప్పారు. వారందరినీ డిర్ కోహిస్థాన్లోని జిల్లా ఆస్పత్రికి తరలించినట్లు పేర్కొన్నారు. ఈ ఘటనపై ఖైబర్ పంఖ్తుంఖ్వా ముఖ్యమంత్రి మెహ్మూద్ ఖాన్ విచారం వ్యక్తం చేశారు. మృతుల కుటుంబాలకు అండగా ఉంటామని హామీ ఇచ్చారు. క్షతగాత్రులకు మంచి చికిత్స అందించాలని అధికారులను ఆదేశించారు.