కొత్త ఆంక్షలతో బ్రిటన్​లో మళ్లీ లాకడౌన్​!

బ్రిటన్​లో కరోనా వైరస్​ మళ్లీ విజృంభిస్తోంది. ఈ నేపథ్యంలో వైరస్​ అలర్ట్​ను మూడు నుంచి నాలుగుకు పెంచింది ప్రభుత్వం ​. దీనితో పాటు గురువారం నుంచి దేశవ్యాప్తంగా పలు ముఖ్యమైన నిబంధనలను అమలు చేస్తున్నట్టు ప్రకటించింది. బాధితులు, మరణాల సంఖ్యను తగ్గించేందుకు నిబంధనలను కచ్చితంగా పాటించాలని సూచించింది.

బ్రిటన్​లో కరోనా వ్యాప్తి మరోమారు ఆందోళనకరంగా మారింది. కరోనా విజృంభణకు చిహ్నంగా.. వైరస్​​ అలర్ట్​ వ్యవస్థను మూడు నుంచి నాలుగుకు పెంచింది అక్కడి ప్రభుత్వం. వైరస్​ వ్యాప్తి తీవ్రంగా ఉందని దీని అర్థం.

ఈ నేపథ్యంలో పలు నూతన ఆంక్షలను విధిస్తున్నట్టు ప్రకటించింది అక్కడి ప్రభుత్వం. గురువారం నుంచి ఆసుపత్రి రంగంలో కీలక నిబంధనలు అమల్లోకి వస్తాయని పేర్కొంది. దీనితో పాటు దేశవ్యాప్తంగా ఉన్న బార్లు, పబ్స్​, రెస్టారెంట్లను రాత్రి 10గంటలకే మూసివేయాలని ఆదేశాలిచ్చింది. హౌస్​ ఆఫ్​ కామన్స్​లో ఈ కొత్త నిబంధనలను మంగళవారం ప్రవేశపెట్టనున్నారు యూకే ప్రధాని బోరిస్​ జాన్సన్​.

పెరుగుతున్న కేసులపై ఇంగ్లాండ్​, స్కాట్​ల్యాండ్​​, ఉత్తర ఐర్లాండ్​, వేల్స్​ ప్రాంతాలకు చెందిన సీఎమ్​ఓలు(చీఫ్​ మెడికల్​ ఆఫీసర్స్​) ఓ ప్రకటనను విడుదల చేశారు.

"దేశంలో కరోనా కేసులు, మరణాలు కొంతకాలం తగ్గిన అనంతరం.. మళ్లీ వేగంగా పెరుగుతున్నాయి. కొన్ని ప్రాంతాల్లో తీవ్ర స్థాయిలో వైరస్​ విజృంభిస్తోంది. ఈ క్రమంలోనే అలర్ట్​ లెవల్​ను 3 నుంచి నాలుగుకు పెంచమని సంయుక్త బయో సెక్యూరిటీ సెంటర్​ సిఫార్సు చేసింది. నేషనల్​ హెల్త్​ సర్వీస్​కు బాధితుల తాకిడితో పాటు భారీ స్థాయిలో మృతుల సంఖ్యను నివారించాలంటే.. ప్రతి ఒక్కరూ భౌతిక దూరాన్ని పాటించాలి. మాస్కులు ధరించాలి. ఇది ప్రజలకు ఆందోళనకరమైన వార్తే అయినప్పటికీ.. నిబంధనలను పాటించాల్సిందే."

-- చీఫ్​ మెడికల్​ ఆఫీసర్స్​. ​

ప్రస్తుతం.. ఇంగ్లాండ్​లోని ఉత్తర ప్రాంతాల్లో కఠినమైన లాక్​డౌన్​ అమలవుతోంది. మంగళవారం నుంచి ఇతర ప్రాంతాలు కూడా లాక్​డౌన్​లోకి రానున్నాయి.

బ్రిటన్​ ప్రస్తుతం 3,98,625 కేసులున్నాయి. కరోనా ధాటికి ఇప్పటివరకు 41,788మంది ప్రాణాలు కోల్పోయారు.

ఇదీ చూడండి:-కరోనా పరీక్షలు నిర్వహించేందుకు ప్రత్యేక రోబో