లాక్​డౌన్​ నిబంధనలు ఉల్లంఘించి ప్రధాని సైకిల్​ యాత్ర!

కరోనా మహమ్మారిని కట్టడి చేసేందుకు విధించిన లౌక్​డౌన్​ నిబంధనలు ఉల్లంఘించి బ్రిటన్​ ప్రధాని బోరిస్​ జాన్సన్​ సైకిల్​పై వెళ్లటం చర్చినీయాంశంగా మారింది. దీనిపై విమర్శలు వెల్లువెత్తిన క్రమంలో ఆయన నిబంధనలు ఉల్లంఘించలేదని వివరణ ఇచ్చుకోవాల్సిన పరిస్థితి వచ్చింది. మరి ఆయన సైకిల్​పై ఎక్కడికి వెళ్లారు? ఎందుకు?

బ్రిటన్​లో కరోనా వ్యాప్తి కొనసాగుతున్న వేళ ఆ దేశ ప్రధాని బోరిస్​ జాన్సన్​ సైకిల్​ రైడింగ్​ చర్చనీయాంశంగా మారింది. లాక్​డౌన్​ నిబంధనలు ఉల్లంఘించి సెంట్రల్​ లండన్​లోని తన ఇంటి నుంచి 11కిలోమీటర్ల మేర సైకిల్​పై వెళ్లటం విమర్శలకు తావిచ్చింది. అయితే ప్రధాని నిబంధనలను ఉల్లంఘించలేదని ప్రభుత్వ అధికార ప్రతినిధి తెలిపారు. ఆయన తన పరిధిలోనే వ్యాయామం చేసేందుకు సైకిల్​పై వెళ్లారని చెప్పుకొచ్చారు. ఓ సీనియర్​ పోలీస్ అధికారి సైతం జాన్సన్​​కు మద్దతుగా నిలిచారు.

స్కాట్​లాండ్ యార్డ్​ కమిషనర్​ డేమ్ క్రెస్సిడా డిక్​ సైతం.. ప్రధాని చర్యను సమర్థించారు. అయితే 'స్టే లోకల్​' అనే విధానానికి సరైన అర్థం ప్రభుత్వం తెలపాలని, దీనివల్ల అధికారులు, ప్రజల్లో ఉన్న గందరగోళం తొలగిపోతుందని ప్రభుత్వానికి విన్నవించారు. ప్రజలు కరోనా నిబంధనలను కచ్చితంగా పాటించాలని సూచించారు క్రెస్సిడా. నిబంధనలు ఉల్లంఘించిన వారికి జరిమానా విధిస్తామన్నారు.

ప్రస్తుతం వ్యాయామానికి బయటకు వెళ్లటం నిబంధనలు ఉల్లంఘించినట్లా? కాదా? అని ప్రజల్లో సందిగ్ధత ఏర్పడింది. అయితే యూకేలో ఒక్కో ప్రాంతంలో లాక్​డౌన్​ నిబంధనలు ఒక్కో విధంగా ఉన్నాయి. ప్రజలు వ్యాయామం కోసం బయటకు రావచ్చని ప్రభుత్వం తెలిపింది. కానీ తమ పరిధి దాటి వెళ్లొద్దని సూచించింది.

ఇదీ చదవండి :'25వ సవరణతో నాకేం ముప్పు లేదు.. కానీ'