కరోనా సోకి స్వల్ప స్థాయిలో అనారోగ్యానికి గురైనప్పటికీ లక్షణాలు మాత్రం నెలల తరబడి ఉంటున్నాయని ఓ అధ్యయనంలో తేలింది. మరికొంత మందిలో రోజులు గడుస్తున్న కొద్దీ అనారోగ్యం మరింత తీవ్రమవుతోందని తెలిసింది. ఈ మేరకు ఫ్రాన్స్లో మార్చి-జూన్‌ మధ్యలో జరిపిన ఓ అధ్యయనాన్ని క్లినికల్‌ మైక్రోబయాలజీ అండ్‌ ఇన్ఫెక్షన్‌ జర్నల్‌లో ప్రచురించారు.
స్వల్ప నుంచి మోస్తరు స్థాయి లక్షణాలున్న 150 మంది కొవిడ్ బాధితులపై ఈ అధ్యయనం జరిపారు. వీరిలో 66.66 శాతం మందిలో కరోనా నిర్ధరణ అయిన 60 రోజుల తర్వాత కూడా లక్షణాలు తగ్గలేదు. రుచి, వాసన కోల్పోవడం, శ్వాస సమస్య, అలసట, జ్వరం, జలుబు సహా మరికొన్ని కొవిడ్ లక్షణాల్లో ఏదో ఒకటి వీరిలో కనిపిస్తున్నట్లు గుర్తించారు.