ఆంక్షల సెగ.. రికార్డు స్థాయిలో పతనమైన రష్యా కరెన్సీ

Ruble to USD: ఉక్రెయిన్‌పై ముప్పెట దాడి కారణంగా స్విఫ్ట్‌ నుంచి బహిష్కరణకు గురైన రష్యా.. దాని పర్యవసానాలను ఎదుర్కొంటోంది. డాలర్‌తో పోలిస్తే ఆ దేశ కరెన్సీ రూబుల్‌ రికార్డు స్థాయిలో క్షీణించింది. రూబుల్‌ పతనంతో అప్రమత్తమైన రష్యా.. కీలక వడ్డీ రేటును రెండింతలు చేసింది.

Ruble to USD: ఉక్రెయిన్‌పై రష్యా చేస్తున్న యుద్ధాన్ని తీవ్రంగా వ్యతిరేకస్తున్న పశ్చిమ దేశాలు గత కొన్ని రోజులుగా మాస్కోపై కఠిన ఆర్థిక ఆంక్షలు విధిస్తూ వస్తున్నాయి. రష్యా ఆర్థిక, బ్యాంకింగ్‌ వ్యవస్థలు కుప్పకూల్చడమే లక్ష్యంగా పాశ్చాత్య దేశాలు ఈ నిర్ణయం తీసుకున్నాయి. అయితే, ఆ దేశాల లక్ష్యం నెరవేరుతున్నట్లు కనిపిస్తోంది. ఈ ఆంక్షలు రష్యా ఆర్థిక వ్యవస్థపై తీవ్ర ప్రభావం చూపుతున్నట్లు తెలుస్తోంది. సోమవారం రష్యా కరెన్సీ రూబుల్‌ విలువ భారీగా పతనమైంది. అమెరికా డాలర్‌తో పోలిస్తే రూబుల్ మారకపు విలువ దాదాపు 30 శాతం క్షీణించి 105.27 వద్ద కొనసాగుతోంది. ప్రస్తుతం ఒక రష్యన్ రూబుల్ విలువ అమెరికన్ సెంట్​ కన్నా తక్కువగా ఉంది. శుక్రవారం ఈ విలువ 84గా ఉంది.

Russian ruble value

రూబుల్ పతనం వల్ల రష్యాలో ధరలు భారీగా పెరిగే అవకాశం ఉంది. ఇదివరకు విధించిన ఆంక్షలు కేవలం రష్యాలోని సంపన్న వర్గాల లక్ష్యంగా ఉండగా.. తాజా ఆంక్షల మాత్రం దేశవ్యాప్తంగా అందరిపై ప్రభావం చూపనున్నాయి. దీని వల్ల దేశంలో రాజకీయంగా పుతిన్​కు తీవ్ర వ్యతిరేకత ఎదురయ్యే అవకాశం ఉంది.

స్విఫ్ట్​ నుంచి బహిష్కారం వల్లే..

SWIFT Russia sanctions: చివరి అస్త్రంగా ప్రపంచంలోని 200కుపైగా బ్యాంకుల మధ్య జరిగే లావాదేవీలకు అనుసంధానంగా వ్యవహరించే 'స్విఫ్ట్‌' సమాచార వ్యవస్థ నుంచి రష్యాను బహిష్కరిస్తూ ఆదివారం అమెరికా, కెనడా, బ్రిటన్‌, ఫ్రాన్స్‌, జర్మనీ, ఇటలీ, ఐరోపా కమిషన్‌ (ఈసీ).. నిర్ణయం తీసుకున్నాయి. ఇప్పటి వరకు విధించిన ఆంక్షల్లో ఇదే అత్యంత కఠినమైంది. రూబుల్‌ పతనం వెనుక ఇదే ప్రధాన కారణంగా తెలుస్తోంది.

రష్యాను అంతర్జాతీయ ఆర్థిక వ్యవస్థ నుంచి ఏకాకిని చేశామని యూకే ప్రధాని బోరిస్ జాన్సన్ పేర్కొన్నారు. జీ7 దేశాలతో పాటు భాగస్వామ్య పక్షాలతో కలిసి పుతిన్​పై అత్యంత కఠినమైన ఆంక్షలు విధించేందుకు కట్టుబడి ఉన్నామని చెప్పారు. పుతిన్ తప్పక ఓటమి చవిచూడాలని అన్నారు.

అప్రమత్తమైన రష్యా..

Russia Central bank key rates: రూబుల్‌ పతనంతో రష్యా అప్రమత్తమైంది. విలువ మరింత దిగజారితే కష్టాలు తప్పవని గ్రహించిన రష్య సెంట్రల్ బ్యాంకు వర్గాలు కీలక నిర్ణయం తీసుకున్నాయి. రూబుల్‌ పతనాన్ని అడ్డుకునే దిశగా చర్యలు చేపట్టాయి. ప్రస్తుతం 9.5 శాతంగా ఉన్న కీలక వడ్డీ రేటును 20 శాతానికి పెంచుతూ నిర్ణయం తీసుకున్నాయి. రష్యా వద్ద ఉన్న 640 బిలియన్‌ డాలర్ల కరెన్సీ నిల్వలపై ప్రభావం పడితే ఆర్థిక స్థిరత్వం దెబ్బతినే ప్రభావం ఉండడం వల్ల ఈ నిర్ణయం తీసుకుందని విశ్లేషకులు చెబుతున్నారు. ఆంక్షల వల్ల కనీసం సగం నిల్వలపై ప్రభావం పడే అవకాశం ఉందని పేర్కొన్నారు.

మరోవైపు, బ్యాంకులకు అధిక నగదు నిల్వలను సమకూర్చాలని రష్య సెంట్రల్ బ్యాంకు నిర్ణయించింది. అలాగే బ్యాంకుల కార్యకలాపాలపై ఉన్న ఆంక్షల్ని సులభతరం చేసింది. విదేశీయులు ప్రభుత్వ ఆబ్లిగేషన్లను విక్రయించకుండా నిషేధం విధించింది. ప్రజలు తమ వద్ద ఉన్న విదేశీ కరెన్సీ ఆదాయంలో 80 శాతాన్ని విక్రయించాలని ఆదేశించింది. రూబుల్‌ను కొనుగోలు చేయాలని సూచించింది.

ఏటీఎంల ముందు బారులు

ఇదిలా ఉంటే, తమ గగనతలంలోకి పలు దేశాలు రష్యా విమానాలను నిషేధించడం ఆ దేశ రవాణా వ్యవస్థపై తీవ్ర ప్రభావం చూపుతోంది. ఇది దేశ ఆర్థిక మూలాలను దెబ్బతీసే ప్రమాదం ఉంది. మరోవైపు నగదు ఉపసంహరణపై పరిమితులు విధించే అవకాశం ఉందన్న భయంతో ప్రజలు ఏటీఎంల ముందు బారులు తీరుతున్నారు. ఒక్కరోజులోనే రష్యన్లు 1.3 బిలియన్‌ డాలర్ల నగదు విత్‌డ్రా చేశారని ఆ దేశ సెంట్రల్‌ బ్యాంక్ వెల్లడించింది.

ఇదీ చదవండి: