ప్రిన్స్​ హ్యారీ కోరికను మన్నించిన బ్రిటన్ రాణి

బ్రిటన్​ ప్రిన్స్​ హ్యారీ, అతని భార్య మేఘన్​ మార్కెల్​ స్వతంత్రంగా జీవించేందుకు రాణి ఎలిజబెత్​-2 అంగీకారం తెలిపారు. బ్రిటన్​తోపాటు కెనడాలో కొంతకాలం గడిపేందుకు అనుమతి ఇచ్చారు.

ప్రిన్స్​ హ్యారీ స్వతంత్రంగా జీవించటానికి అంగీకరించారు బ్రిటన్​ రాణి ఎలిజబెత్​-2. యూకే, కెనడా దేశాల్లో కొంత కాలం గడపడానికి వారికి అనుమతిని ఇచ్చారు. హ్యారీ, అతని భార్య మేఘన్​తో బ్రిటన్​ రాణి జరిపిన ముఖాముఖి చర్చల అనంతరం ఈ నిర్ణయం తీసుకున్నట్లు ప్రకటించింది బకింగ్​హామ్​ ప్యాలెస్​.

"మా మనవడు అతని కుటుంబం భవిష్యత్తు నిర్ణయంపై చర్చలు జరిగాయి. హ్యారీ, అతని భార్య కొత్త జీవితాన్ని గడపటానికి మా కుటుంబం మొత్తం పూర్తిగా అంగీకరిస్తున్నాం. రాజకుటుంబ సభ్యులుగా కొనసాగాలని కోరాం. స్వతంత్రగా జీవించాలనే నిర్ణయాన్ని అర్థం చేసుకొని వారి కోరికను గౌరవిస్తున్నాం."
- బకింగ్​హామ్​ రాజభవనం ప్రకటన

ఈ కొత్త జీవితంలో బ్రిటన్​ ప్రజా ధనాన్ని వినియోగించకూడదని హ్యారీ నిర్ణయం తీసుకున్నట్లు తెలిపారు. అయితే ఇలాంటి సంక్లిష్టమైన అంశాలపై మరోసారి చర్చించాల్సిన అవసరం ఉందని రాణి అభిప్రాయపడ్డారు.

నటిగా రీ ఎంట్రీ...

ఆర్థికంగా స్వతంత్రంగా ఉంటామని ప్రకటించిన హ్యారీ, మేఘన్​.. తమ ఉద్యోగ ప్రయత్నాలను మొదలుపెట్టారు. పెళ్లికి ముందు మేఘన్​ వదిలేసిన నటనవైపే ఆమె మొగ్గు చూపారు. ఈ మేరకు డిస్నీ లండన్​తో మేఘన్​ ఒప్పందం చేసుకున్నారు.

ఇదీ చూడండీ:కశ్మీర్​లో ఎదురు కాల్పులు-ఉగ్రవాది హతం