బ్రెగ్జిట్​కు లైన్​ క్లియర్.. బోరిస్, ఈయూ అధికారుల ఆమోదం

ఈ నెల 31న యూరోపియన్ యూనియన్​ నుంచి బ్రిటన్​ వైదొలిగే బ్రెగ్జిట్ ఒప్పందంపై ఆ దేశ ప్రధాని బోరిస్​ జాన్సన్​ సంతకం చేశారు. ఇప్పటికే క్వీన్​ ఎలిజబెత్​ ఆమోదించిన బ్రెగ్జిట్​కు బ్రస్సెల్స్​లోని ఈయూ అత్యున్నత అధికారులు సైతం పచ్చజెండా ఊపారు.

బ్రిటన్ చరిత్రలో కీలక ఘట్టమైన బ్రెగ్జిట్​కు​ మార్గం మరింత సుగమమైంది. ఇప్పటికే క్వీన్ ఎలిజబెత్​-2 అధికారిక ముద్ర వేసిన బ్రెగ్జిట్​ ఒప్పందంపై తాజాగా ఆ దేశ ప్రధానమంత్రి బోరిస్​ జాన్సన్​ సంతకం చేశారు. బ్రస్సెల్స్​లోని యూరోపియన్​ యూనియన్​కు చెందిన ఇద్దరు అత్యున్నత అధికారులు సైతం శుక్రవారమే ఆమోదం తెలిపారు. ఇదే విషయాన్ని ట్విట్టర్లో పంచుకున్నారు జాన్సన్​.

" బ్రిటిష్​ ప్రజా తీర్పును గౌరవిస్తూ.. జనవరి 31న ఈయూ నుంచి బ్రిటన్​ వైదొలిగే బ్రెగ్జిట్​ ఒప్పందంపై నేను ఇవాళ సంతకం చేశాను."
- బోరిస్​ జాన్సన్​, బ్రిటన్ ప్రధానమంత్రి

యూరోపియన్​ పార్లమెంట్ ముందుకు బ్రెగ్జిట్​

వచ్చేవారం యూరోపియన్​ పార్లమెంట్​ ఈ ఒప్పందానికి మద్దతు తెలపాల్సి ఉంది. అదే జరిగితే లండన్​లో ఇది ఓ చారిత్రక ఘట్టంగా మిగిలిపోతుంది. ఎందుకంటే 28 సభ్య దేశాలు కలిగిన ఈయూ నుంచి వైదొలగిన తొలి దేశంగా బ్రిటన్​ నిలుస్తుంది. జాన్సన్​కు తాను పదవి చేపట్టిన కాలంలో ఇదో పెద్ద విజయం అవుతుంది.

పంతం నెగ్గించుకున్న బోరిస్

మాజీ ప్రధాని థెరెసా మే... 2018లో బ్రెగ్జిట్​ ఒప్పందంపై చర్చలు జరిపారు. దిగువ సభ ఈ విషయాన్ని మూడుసార్లు తిరస్కరించింది. ఫలితంగా.. థెరెసా రాజీనామా చేయాల్సి వచ్చింది. అయితే ఆ తర్వాత ప్రధానిగా బాధ్యతలు చేపట్టిన బోరిస్​... బ్రెగ్జిట్​ను సాకారం చేసేందుకు చాలా కృషి చేశారు. మెజారిటీ లేకపోవడం వల్ల గతనెలలో ఎన్నికలకు వెళ్లారు. జాన్సన్​ అధిక మెజారిటీతో తిరిగి అధికారాన్ని చేపట్టారు. ఆ తర్వాత ఎంపీలు ఈ ఒప్పందానికి మద్దతు పలికారు. ఐరోపా సమాఖ్య నుంచి తమ దేశ నిష్క్రమణకు ఉద్దేశించిన బ్రెగ్జిట్ ఒప్పందాన్ని బ్రిటన్​ పార్లమెంట్​ ఇదివరకే ఆమోదించింది.

బ్రెగ్జిట్ తరువాతేంటి?

ఈయూ నుంచి బ్రిటన్​ వైదొలిగిన తరువాత ఏం చేయాలనే దానిపై బ్రిటన్​ ప్రధాని బోరిస్​ ఫిబ్రవరి ప్రారంభంలో ఓ విధాన నిర్ణయం తీసుకునే అవకాశముంది.