భారత్లో గుర్తించిన కరోనా రకం (బీ.1.617) ఇప్పుడు 53 దేశాలకు పాకిందని ప్రపంచ ఆరోగ్య సంస్థ(డబ్ల్యూహెచ్ఓ) వెల్లడించింది. ఆరోగ్య సంస్థకు అనధికారికంగా అందిన సమాచారం ప్రకారం.. మరో ఏడు దేశాలకు కూడా ఆ వైరస్ రకం విస్తరించింది. దీంతో బీ.1.617 రకం బయటపడిన దేశాల సంఖ్య 60కి చేరినట్లు తెలుస్తోంది. ఈ కొత్త రకం వేగంగా సంక్రమిస్తోందని, అయితే దీని బారిన పడినవారిలో తీవ్రత ఏవిధంగా ఉంటుందనేదానిపై పరిశీలన జరుగుతోందని సంస్థ తెలిపింది.
బ్రిటన్‌ (బీ.1.1.7), దక్షిణాఫ్రికా (బీ.1.351), బ్రెజిల్‌ (పీ.1), భారత్ (బీ.1.617)లో మొదట గుర్తించిన కరోనా కొత్త రకాలను ఆరోగ్య సంస్థ ఆందోళన కలిగించే రకాలుగా వర్గీకరించింది. ఈ రకాలన్ని ప్రపంచవ్యాప్తంగా పలు దేశాలకు విస్తరించి వైరస్ వ్యాప్తిని మరింత పెంచాయి. 149 దేశాల్లో బీ.1.1.7 రకం, 102 దేశాల్లో బీ.1.351, 59 దేశాల్లో పీ.1 రకాన్ని గుర్తించినట్లు తెలిపింది. అలాగే బీ.1.617 రకాన్ని మూడుగా విభజించింది. అవి.. బీ.1.617.1, బీ.1.617.2, బీ.1.617.3. వీటిలో మొదటిది 41 దేశాలకు, రెండవది 54 దేశాలకు, మూడవది ఆరు దేశాలకు విస్తరించింది. మొత్తంగా ఈ రకాన్ని 53 దేశాల్లో గుర్తించినట్లు పేర్కొంది. అనధికారిక సమాచారం ప్రకారం ఆ సంఖ్య 60గా ఉంది.