బ్రిటన్ పార్లమెంట్ సమావేశాల రద్దుపై కోర్టుకు విపక్షాలు బ్రిటన్ పార్లమెంట్ సమావేశాల రద్దుకు వ్యతిరేకంగా కోర్టులో పలు పిటిషన్లు దాఖలయ్యాయి. యూరోపియన్ అనుకూలవాదులు, ఒప్పందం లేని బ్రెగ్జిట్ను వ్యతిరేకిస్తున్న ఎంపీలు న్యాయస్థానాన్ని ఆశ్రయించారు. ప్రధాని నిర్ణయాన్ని విపక్షాలు తీవ్రంగా తప్పుబట్టాయి. సమావేశాల రద్దు రాజ్యాంగ విరుద్ధమని ఆరోపించాయి. లండన్, ఎడిన్బర్గ్, బెల్పాస్టల్లోని కోర్టుల్లో పలు పిటిషన్లు దాఖలయ్యాయి. అత్యవసర విచారణ చేపట్టాలని కోరారు ఎంపీలు. 75 మంది ఎంపీలు సమావేశాల రద్దును నిలిపివేసేందుకు మధ్యంతర ఉత్తర్వులు ఇవ్వాలని స్కాట్లాండ్లోని అత్యున్నత సివిల్ కోర్టులో పిటిషన్ దాఖలు చేశారు.
బుధవారం అందరిని ఆశ్చర్యపరుస్తూ.. అక్టోబర్ 14 వరకు పార్లమెంట్ సమావేశాలను రద్దు చేస్తున్నట్లు ప్రధాని బోరిస్ జాన్సన్ ప్రకటించారు. ఐరోపా సమాఖ్య నుంచి వైదొలిగేందుకు సరికొత్త శాసన అంజెండాను రూపొందించేందుకు వీలుగా సమావేశాలను తాత్కాలికంగా వాయిదా వేయాలని నిర్ణయించారు. ఈ ప్రతిపాదనకు ఎలిజబెత్ రాణి-2 ఆమోద ముద్ర వేశారు.
నిరసనలు..
సమావేశాల రద్దు నిర్ణయానికి వ్యతిరేకంగా లండన్, మాంచెస్టర్, ఎడిన్బర్గ్ ప్రాంతాల్లో వేల మంది నిరసనలు చేపట్టారు. రోడ్లపైకి వచ్చి ప్రధానికి వ్యతిరేకంగా నినాదాలు చేశారు. 1.4 మిలియన్ల సంతకాలతో ఆన్లైన్ పిటిషన్ దాఖలు చేశారు. శనివారం మరిన్ని ప్రాంతాల్లో ఆందోళనలు చేప్టటాలని ప్రతిపక్ష లేబర్ పార్టీ పిలుపునిచ్చింది.
పార్లమెంట్ సమావేశాల రద్దును ఆర్చ్-బ్రెక్సైటర్ మంత్రి జాకబ్ రీస్-మోగ్ సమర్థించారు. అక్టోబర్ 31కి ముందే బ్రెగ్జిట్పై చర్చించడానికి ఎంపీలకు సమయం ఉంటుందని తెలిపారు.
ఇదీ చూడండి:పార్లమెంటు సమావేశాల రద్దుకు బ్రిటన్ రాణి ఆమోదం
