చైనాలో విజృంభిస్తున్న కరోనా వైరస్పై ఆ దేశ అధ్యక్షుడు జిన్పింగ్ స్పందించారు. వైరస్ కారణంగా మృతుల సంఖ్య 41కి చేరగా.. చైనా ప్రస్తుతం గడ్డుకాలాన్ని ఎందుర్కొంటోందన్నారు. ఈ వైరస్పై జరుగుతున్న యుద్ధంలో తప్పనిసరిగా గెలుస్తామని విశ్వాసం వ్యక్తం చేశారు.
కరోనా వైరస్ వేగంగా ఇతర దేశాలకూ వ్యాపిస్తోందని.. ఇప్పటివరకు దేశవ్యాప్తంగా 13 వందల మందికి పైగా ఈ వైరస్ బారిన పడినట్లు చైనా ప్రభుత్వం ప్రకటించింది. ఇందులో 239 మంది పరిస్థితి అత్యంత విషమంగా ఉన్నట్టు తెలిపింది.
నూతన ఏడాది ఈవెంట్లు రద్దు
వుహాన్ నగరంలో ప్రారంభమైన ఈ వైరస్ ఇప్పటివరకు 30 రాష్ట్రాలకు వ్యాపించింది. సుమారు 18 నగరాల్లో రవాణా వ్యవస్థను పూర్తిగా నిషేధించారు. దేశ వ్యాప్తంగా కరోనా ప్రబలుతున్న నేపథ్యంలో ప్రముఖ పర్యటక ప్రాంతాలను మూసేశారు. లూనార్ నూతన ఏడాది సందర్భంగా పెద్ద ఎత్తున ఈవెంట్లను రద్దు చేశారు అధికారులు. అంతే కాకుండా నగర సరిహద్దులో ప్రవేశించిన వాహనాలను తాత్కాలికంగా నిలిపేసినట్లు వెల్లడించారు.
పాముల వల్ల కాదు
వైరస్ వ్యాప్తిని దృష్టిలో పెట్టుకుని 13 నగరాల్లో కఠిన ఆంక్షలు విధించింది. ఈ వైరస్ పాముల వల్ల వ్యాప్తి చెందినట్టు వస్తున్న వదంతుల్లో నిజం లేదని శాస్త్రవేత్తలు వెల్లడించారు. వైరస్ కచ్చితమైన మూలాన్ని కనుగొనే ప్రయత్నాల్లో ఉన్నట్లు తెలిపారు.
