మది దోచే కారేదో.!

సోమవారం నుంచి స్విట్జర్లాండ్​లోని జెనివాలో అంతర్జాతీయ కార్ల ప్రదర్శన జరగనుంది. రేపు జరిగే ప్రదర్శనలో ఈ ఏడాది మేటి కారును ప్రకటించనున్నారు నిర్వాహకులు.

అంతర్జాతీయ స్థాయి ఆటోమొబైల్ ప్రదర్శన స్విట్జర్లాండ్​లోని జెనివాలో జరగనుంది. మార్చి 4 నుంచి 17వ తేదీ వరకు దీన్ని నిర్వహించనున్నారు. సోమవారం ప్రారంభ ప్రదర్శనలోనే అత్యుత్తమ కారును ప్రకటిస్తారు. గతేడాది వోల్వో ఎక్స్​సీ 40 విజేతగా నిలిచింది. ఈ ఏడాది పోటీల్లో అల్పైన్ ఏ110, సిట్రాయిన్ సీ5 ఎయిర్​క్రాస్, ఫోర్డ్ ఫోకస్, జాగ్వార్ ఐ-పేస్, కియా క్రీడ్, మెర్సెడెస్ బెంజ్ ఏ క్లాస్, ఫ్యుజెట్ 508 అవార్డుకు నామినేట్ అయ్యాయి.

జాగ్వార్ లాండ్ రోవర్ సైతం ఈ ఏడాది ప్రదర్శనలో పాలు పంచుకోనుంది. ఐరోపా సమాఖ్య నుంచి బ్రిటన్ బయటకు రావడం, చైనాలో జాగ్వార్​ ఉత్పత్తులకు డిమాండ్ పడిపోయిన కారణంగా 4500 ఉద్యోగులను తొలగించనున్నామని గతంలో ప్రకటించింది జాగ్వార్. పోటీల్లో తమ కారును ఉంచేందుకు లాండ్​ రోవర్​ను సైతం ప్రదర్శనకు పంపింది.

అరవై మంది... 23 ఐరోపా దేశాలు

ఈ అంతర్జాతీయ కార్ల ప్రదర్శనకు జ్యూరీ సభ్యులుగా 23 ఐరోపా దేశాలకు చెందిన 60మంది వ్యవహరిస్తున్నారు. ఆయా దేశాలకున్న కార్ల మార్కెట్​ను బట్టి జ్యూరీలో స్థానాల్ని కేటాయిస్తారు. అత్యధికంగా జర్మనీ నుంచి ఆరుగురు సభ్యులు, డెన్మార్క్​ నుంచి ఒక సభ్యుడు జ్యూరీలో ఉన్నారు.

ఈ మెగా ఈవెంట్​లో 900 పైచిలుకు కార్లను ప్రదర్శించనుండగా, 150 పైన కార్లు ఐరోపా కంపెనీలకు చెందినవే. నాలుగు నుంచి ఏడో తేదీ వరకు విలేకరులు, ప్రముఖులు ఈ ప్రదర్శనలో పాల్గొంటారు. 7-17తేది వరకు సాధారణ ప్రజానీకాన్ని ఈ ప్రదర్శనకు అనుమతిస్తారు.