భారత వ్యతిరేక తీవ్రవాద, వేర్పాటువాద శక్తులను కట్టడి చేయాల్సిన అవసరం ఉందని బ్రిటన్ ప్రధాని బోరిస్ జాన్సన్ అన్నట్లు విదేశీ వ్యవహారాల కార్యదర్శి హర్ష వర్ధన్‌ శ్రింగ్లా పేర్కొన్నారు. గ్లాస్గోలోని ఐరాస వాతావరణ సదస్సు (కాప్ 26) సందర్భంగా ప్రధాని నరేంద్ర మోదీ, బోరిస్ మధ్య ఈ మేరకు ద్వైపాక్షిక చర్చలు జరిగినట్లు తెలిపారు.
"బోరిస్, ప్రధాని మోదీ మధ్య స్వల్పకాల వ్యవధిలో జరిగిన ఈ చర్చల్లో ఇరు దేశాల్లో జరుగుతున్న తీవ్రవాద కార్యకలాపాలపై ఆందోళన వ్యక్తం చేశారు. కొందరు ఎలాంటి హక్కుల లేకుండానే చట్టవిరుద్ధమైన చర్యలకు దిగుతున్నారు. దీని వల్ల గందగోళ పరిస్థితులు నెలకొంటున్నాయన్న అంశాలు చర్చకు వచ్చాయి."
- విదేశీ వ్యవహారాల కార్యదర్శి హర్ష వర్ధన్‌ శ్రింగ్లా
ఈ నేపథ్యంలో.. వేర్పాటువాద ముఠాలను కట్టడి చేయాల్సిన అవసరం ఉందని బోరిస్ పేర్కొన్నారు. ప్రజాస్వామ్య లేదా రాజ్యాంగబద్ధంగా అలాంటి ముఠాలను నిరోధించడానికి చర్యలు తీసుకోవాలని స్పష్టం చేశారు. ఈ క్రమంలోనే వాతావరణ మార్పుపై భారత్ నాయకత్వాన్ని ప్రశంసించారు.
ఈ క్రమంలో మాట్లాడిన మోదీ వాతావరణ మార్పులను ఎదుర్కోవడానికి నిధుల సమీకరణ (క్లైమేట్‌ ఫైనాన్స్‌), పునరుత్పాదక ఇంధనాలు, సౌరశక్తి వంటి సంయుక్త కార్యక్రమాలపై బ్రిటన్‌తో కలిసి పనిచేస్తామని మోదీ చెప్పారు. మరోవైపు, పరారీలో ఉన్న ఆర్థిక నేరస్థులు విజయ్ మాల్యా, నీరవ్ మోదీలను అప్పగించే అంశాన్ని మోదీ ప్రస్తావించారు. ఎంతో కీలకమైన ఈ అంశంపై ఇరు దేశాల భద్రత సలహాదారులు నవంబరు 3న ప్రత్యేకంగా భేటీ కానున్నారు.
ఇవీ చూడండి:
