అల్బేనియా: భూకంప ఘటనలో 20కి చేరిన మృతులు

అల్బేనియాలో భారీ భూకంపం విధ్వంసం సృష్టించింది. ఇప్పటి వరకు ఈ ప్రమాదంలో 20 మంది మృత్యువాతపడ్డారు. 600కు పైగా క్షతగాత్రులయ్యారు. శిథిలాల కింద చిక్కుకున్న బాధితులను రక్షించేందుకు.. సహాయక సిబ్బంది చర్యలు కొనసాగుతున్నాయి.

అల్బేనియాలో తీరం వెంబడి పలుమార్లు సంభవించిన భూకంపాల తీవ్రతకు మృతుల సంఖ్య 20కి చేరింది. 600 మంది క్షతగాత్రులయ్యారు. బాధితులను కాపాడేందుకు సహాయక చర్యలు కొనసాగుతున్నాయి. మృతులు అధికంగా తుమనే, డర్రస్​ పట్టణాలకు చెందినవారిగా అధికారులు నిర్ధరించారు. మంగళవారం రాత్రి 42 మందిని కాపాడినట్లు తెలిపారు. క్షతగాత్రులకు చికిత్స అందిస్తున్నట్లు వైద్య శాఖ మంత్రి వెల్లడించారు.

తమ కుటుంబసభ్యుల ఆచూకీ కోసం బంధువులు విలవిల్లాడుతున్నారు.

"మా అమ్మ, మేనకోడలు భవనంలో చిక్కుకుపోయారు. వారు బతికి ఉన్నారో లేదో తెలియట్లేదు. నాకు చాలా భయంగా ఉంది."

-50 ఏళ్ల బాధితుడు.

తుమనే, డర్రస్​ పట్టణంలో దాదాపు 300 మంది సైనికులు, 1900 పోలీసు అధికారులు రంగంలోకి దిగినట్లు తెలిపింది ప్రభుత్వం. ఇటలీ, గ్రీస్​, రొమేనియా దేశాల నుంచి సహాయక సిబ్బంది మోహరించారు.

దేశ రాజధాని తిరానాకు వాయువ్యాన 30 కిలోమీటర్ల దూరంలో వచ్చిన భూకంప తీవ్రత రిక్టర్ స్కేలుపై 6.4గా నమోదైంది. మరో రెండు భూకంపాలు 5.1, 5.4 తీవ్రతతో సంభవించాయి. పెద్ద పెద్ద భవనాలు సైతం నేలకూలాయి.

ఇదీ చూడండి : అల్బేనియాలో భూకంపం- ఆరుగురు మృతి