అందులో మేమూ పాల్గొంటాం: పాక్

కరోనా వైరస్​పై ఉమ్మడిగా పోరాడదామంటూ సార్క్​ దేశాలకు భారత్ ఇచ్చిన పిలుపుపై స్పందించింది దాయాది పాకిస్థాన్. ప్రధాని మోదీ ఏర్పాటు చేయబోయే వీడియో కాన్ఫరెన్స్​లో తమనూ భాగస్వాములను చేయాలని కోరింది. ఈ నేపథ్యంలో పాక్ ప్రకటనపై భారత్ ఎలా స్పందిస్తుందో వేచి చూడాలి.

కరోనా వైరస్​ను ఎదుర్కొనేందుకు తీసుకోవాల్సిన చర్యలపై సార్క్ దేశాల అధినేతలతో వీడియో కాన్ఫరెన్స్ నిర్వహించేందుకు సంకల్పించారు ప్రధానమంత్రి నరేంద్రమోదీ. ఈ నేపథ్యంలో తాము కూడా ఈ కార్యక్రమంలో భాగం కావాలనుకుంటున్నట్లు ప్రకటించింది దాయాది పాకిస్థాన్. ఈ మేరకు పాక్​ విదేశాంగ శాఖ అధికార ప్రతినిధి ఆయేషా ఫారూఖీ ట్విట్టర్​ వేదికగా పోస్ట్ చేశారు. సార్క్ దేశాల వీడియో కాన్ఫరెన్స్​లో పాక్ ప్రధాన మంత్రి ఇమ్రాన్ ఖాన్​కు ఆరోగ్య రంగంలో ప్రత్యేక అధికారిగా వ్యవహరిస్తున్న జాఫర్ మీర్జా అందుబాటులో ఉంటారని పేర్కొన్నారు.

"కొవిడ్-19 ప్రమాదాన్ని ఎదుర్కొనేందుకు అంతర్జాతీయంగా, ప్రాంతీయంగా చర్యలు చేపట్టాల్సి ఉంది. ఆరోగ్య శాఖలో ప్రధానమంత్రి ప్రత్యేక అధికారి అందుబాటులో ఉంటారు."

-పాక్ విదేశాంగ శాఖ ట్వీట్

ప్రపంచవ్యాప్తంగా 5వేలమందికిపైగా ప్రాణాలు పోయేందుకు కారణమైన కరోనాను ఎదుర్కొనేందుకు సార్క్​ దేశాల భాగస్వామ్యంలో ఓ సంయుక్త కార్యాచరణను చేపట్టాలని మోదీ పిలుపునిచ్చిన అనంతరం పాక్ ఈ ప్రకటన చేయడం విశేషం. నేపాల్, భూటాన్, శ్రీలంక, అఫ్గానిస్థాన్ దేశాధినేతలు కూడా సానుకూలంగా స్పందించారు.

అయితే పుల్వామా దాడి అనంతరం సార్క్ కూటమిలో పాక్ భాగమైతే తాము పాల్గొనబోమని హెచ్చరిస్తూ వస్తోంది భారత్. ఈ నేపథ్యంలో పాక్ ప్రకటనపై భారత్ ఎలా స్పందిస్తుందో వేచి చూడాల్సి ఉంది.

ఇదీ చూడండి:'మోదీజీ.. మాస్క్​ల ఎగుమతులకు అనుమతినివ్వండి'