'చైనాలో విదేశీయుల తరలింపునకు సిఫార్సు చేయలేదు'

చైనాలోని విదేశీయులను తరలించేందుకు ఎలాంటి సిఫారసు చేయలేదని డబ్ల్యూహెచ్ఓ తెలిపింది. కరోనా వైరస్​ వ్యాప్తి చెందకుండా కృషి చేస్తున్న చైనా అధికారులను ప్రశంసించారు ప్రపంచ ఆరోగ్య సంస్థ చీఫ్​.

చైనాలోని హుబే రాష్ట్రంలో నివాసముంటున్న విదేశీయులను తరలించేందుకు తాము సిఫార్సు చేయలేదని ప్రపంచ ఆరోగ్య సంస్థ(డబ్ల్యూహెచ్​ఓ) చీఫ్​ టెడ్రోస్ ఘెబ్రేయేసుస్​ తెలిపారు. చైనా విదేశాంగ మంత్రి వాంగ్​ యీతో సమావేశం అనంతరం టెడ్రోస్​ ఈ వ్యాఖ్యలు చేశారు.

చైనాలో కరోనా వైరస్​ విజృంభిస్తున్న నేపథ్యంలో భారత్​, అమెరికా సహా ఇతర దేశాలు తమ పౌరులను హుబే రాష్ట్రం నుంచి తరలించేందుకు సన్నాహాలు చేస్తున్నాయి. దాదాపు 250కిపైగా భారతీయుల్లో ఎక్కువగా విద్యార్థులు హూబీ రాష్ట్రంలోని భారతీయ, అంతర్జాతీయ సంస్థల్లో పని చేస్తున్నారు. ఇప్పటికే వుహాన్​లో తమ దేశ పౌరులను తరలించేందుకు విదేశాలకు అనుమతినిచ్చింది చైనా.

చైనా కృషి అభినందనీయం..

వైరస్​ సమస్యలపై చైనా అధికారులతో చర్చలు జరిపేందుకు వచ్చిన డబ్ల్యూహెచ్​ఓ చీఫ్​​.. వైరస్​ను అరికట్టడంలో చైనా చేస్తున్న కృషిని ప్రశంసించారు. చైనాకు మరింత సహకారాన్ని అందించాలని ప్రపంచ ఆరోగ్య సంస్థ భావిస్తోందని, అవసరమైన సాయం అందించడానికి సిద్ధంగా ఉన్నట్లు స్పష్టం చేశారు.

రోజురోజుకూ పెరుగతున్న మృతులు

కరోనా వైరస్ మహమ్మారి వల్ల చైనాలో మంగళవారం 24 మంది మరణించారు. దీంతో మృతుల సంఖ్య 106కు చేరుకుంది. ఇప్పటివరకు 4,515 మందికి వైరస్​ సోకినట్లు సమాచారం. ఆఫ్రికా​ దేశాలతో సహా బంగ్లాదేశ్​, శ్రీలంక, పాక్​ దేశాల నుంచి వేలాది మంది విదేశీ పౌరులను వైరస్​ సోకిన రాష్ట్రాల నుంచి వెళ్లకుండా నిలువరించారు.

విదేశాలకు సూచన...

వైరస్​ను త్వరగా గుర్తించి.. వ్యాప్తి చెందకుండా నివారణకు కృషి చేయాలని నేపాల్​, థాయి​లాండ్​, దక్షిణ, ఆగ్నేయ ఆసియా దేశాలను డబ్ల్యూహెచ్​ఓ కోరింది. కేసును గుర్తించడం, పరీక్షించడం, క్లినికల్​ మేనేజ్​మెంట్​, వ్యాధి సంక్రమించకుండా నివారణతో పాటు వైరస్​ సోకిన అనుమానితులను ఇంటివద్దనే వైద్య పరిశీలనలో ఉంచాలని మార్గనిర్దేశకం చేసింది.