అఫ్గాన్ సంక్షోభంలోనూ చెక్కుచెదరకుండా ఉన్న పంజ్షీర్ ప్రాంతంపై తాలిబన్లు కన్నేశారు. రాజధాని కాబుల్ను తమ వశం చేసుకున్న వారం రోజులకు.. పంజ్షీర్వైపు కదిలేందుకు సాహసం చేశారు. లొంగిపోవాలని ఆ ప్రాంత ప్రజలుకు ఇప్పటికే డెడ్లైన్ విధించారు. తాలిబన్లు కొందరు ఇప్పటికే శక్తిమంతమైన ఆయుధాలతో పంజ్షీర్ వైపు కదులుతున్నట్లు సమాచారం.
కోట కూలుతుందా?
పంజ్షీర్ అంటే.. తాలిబన్లకు ఎప్పటి నుంచే వణుకే. 1990లో ఆ ప్రాంతాన్ని ఆక్రమించుకునేందుకు విశ్వప్రయత్నాలు చేశారు. కానీ అవేవీ ఫలించలేదు. అందుకు కారణం.. అహ్మద్ షా మసూద్. తాలిబన్లపై గెరిల్లా పోరాటంలో కీలకంగా వ్యవహరించారు మసూద్.
అయితే.. తాలిబన్లు ఇప్పుడు రెట్టింపు ఉత్సాహంతో ఉన్నారు. అమెరికా దళాలు పూర్తిగా వెనుదిరగకుండానే కాబుల్ను మెరుపువేగంతో ఆక్రమించుకున్నారు. దీనితో ఆత్వవిశ్వాసం పెరిగింది. ఈ నేపథ్యంలో.. పంజ్షీర్ను దక్కించుకునేందుకు దూసుకెళుతున్నారు. ఇప్పటికే అల్టిమేటం జారీ చేశారు. తక్షణమే లొంగిపోవాలని.. లేకపోతే ఆ ప్రాంతంలో విధ్వంసం సృష్టిస్తామని హెచ్చరించారు. ఈ విషయాన్ని అఫ్గాన్ రాజకీయ, సామాజిక కార్యకర్త నాసిర్ అహ్మద్ షేర్జాయ్ వెల్లడించారు.
అయితే ఈసారి కూడా తాలిబన్ల ప్రయత్నం ఫలించదని షేర్జాయ్ ధీమా వ్యక్తం చేశారు. ఎన్నో ప్రతికూల పరిస్థితులు వారికి స్వాగతం పలుకుతాయని తెలిపారు.
ఏంటీ పంజ్షీర్...?
హిందూకుష్‌ పర్వత శ్రేణులకు సమీపంలో కాబుల్‌కు ఉత్తరాన 150 కి.మీల దూరంలో పంజ్‌షిర్‌ ప్రావిన్స్‌ ఉంది. దాదాపు లక్షకు పైగా జనాభా కలిగిన ఈ ప్రాంతంలో తజిక్‌ జాతికి చెందిన ప్రజలే అత్యధికం. పంజ్‌షిర్‌ అంటే సంస్కృతంలో ఐదు సింహాలు అని అర్థం.
కొన్ని శతాబ్దాల కాలంగా పంజ్‌షిర్‌ ఓ ప్రతిఘటన ప్రాంతంగా ఉండటం వల్ల అటు విదేశీ బలగాలు గానీ, ఇటు తాలిబన్లు గానీ కాలుపెట్టలేకపోతున్నాయి. పంజ్‌షిర్‌ పేరుకు తగ్గట్టే అక్కడి ప్రజల్లో తెగింపు చాలా ఎక్కువ. అనేక తిరుగుబాట్లకు ఈ ప్రాంతమే వేదికగా నిలిచింది. గతంలో తాలిబన్ల పాలనను తుదముట్టించడంలోనూ ఈ ప్రాంతానిదే కీలక పాత్ర. అక్కడి ప్రజల్లో ఉన్న ఉద్యమ స్ఫూర్తిని మరింతగా రగిలించి వారిని మార్గదర్శకత్వం చేసిన వారిలో తాలిబన్ వ్యతిరేక నాయకుడు అహ్మద్ షా మసూద్. ఆయన తాలిబన్ల అంతానికి అహర్నిశలు కృషిచేశారు.
అయితే తాలిబన్లు, ఆల్‌ఖైదాలు కలిసి నకిలీ విలేకరుల వేషాల్లో మీడియా ఇంటర్వ్యూ చేస్తూ 2001 సెప్టెంబర్‌ 9న జరిపిన ఆత్మాహుతి దాడిలో మసూద్ ప్రాణాలు కోల్పోయారు. ఆ తర్వాత రెండు రోజులకే అమెరికాపై ఆల్‌ఖైదా దాడులు చేయడం యావత్‌ ప్రపంచాన్నిఆందోళనకు గురిచేసింది. ఇదే చివరకు నాటో దళాలు అఫ్గాన్‌పై దాడి చేయడం, మసూద్ దళాలతో ఆ బలగాల స్నేహానికి దారితీసింది. ఆ తర్వాత ఉత్తర కూటమి తాలిబన్ల రాక్షస పాలనకు వ్యతిరేకంగా రెండు నెలల పాటు సుదీర్ఘ పోరాటం జరిపింది. డిసెంబర్‌ 2001 డిసెంబర్‌ నాటికి తాలిబన్ల పాలనను అంతం చేసి విజయం సాధించింది.
ఇదీ చూడండి:-Afghan crisis: ఆకలి మరచి.. ప్రాణాలు అరచేతిలో పెట్టుకుని..
