Russia-Ukraine Crisis: ఉక్రెయిన్‌పై యుద్ధం ప్రకటించిన రష్యా అధ్యక్షుడు వ్లాదిమిర్‌ పుతిన్ ఇప్పుడు భారీ బెదిరింపులకు దిగారు. తన అణ్వస్త్ర బలగాలకు అప్రమత్తత సందేశం ఇవ్వడం ద్వారా ప్రపంచదేశాలను ఒక్కసారిగా ఉలికిపాటుకు గురిచేశారు. ఈ నేపథ్యంలో రష్యా అణ్వస్త్ర సామర్థ్యం చర్చనీయాంశమైంది. సోవియట్‌ యూనియన్‌ విచ్ఛిన్నమయ్యాక రష్యాకు పెద్ద సంఖ్యలో అణ్వాయుధాలు వారసత్వంగా సంక్రమించాయి. ఆ తర్వాతికాలంలో వాటిని గణనీయంగా తగ్గించుకుంది. అయినా ఇప్పటికీ ప్రపంచంలో అతిపెద్ద అణ్వాయుధాగారాన్ని ఆ దేశం కలిగి ఉంది. ‘ఫెడరేషన్‌ ఆఫ్‌ అమెరికన్‌ సైంటిస్ట్స్‌’ అంచనా ప్రకారం 2022 నాటికి రష్యా వద్ద 5,977 అణ్వస్త్రాలు ఉన్నాయి. వాటిలో 1,588 వార్‌హెడ్లను బాలిస్టిక్‌ క్షిపణుల్లో, భారీ బాంబర్‌ యుద్ధవిమానాల స్థావరాల్లో మోహరించింది. మిగతావాటిని రిజర్వులో ఉంచింది.
ప్రయోగ పద్ధతి ఇలా..
రష్యా వద్ద ఉన్న ఖండాంతర క్షిపణులు.. ప్రయోగించిన 10 నిమిషాల తర్వాత సెకనుకు నాలుగు మైళ్ల వేగాన్ని అందుకోగలవు. ఈ లెక్కన అవి బ్రిటన్‌ను 20 నిమిషాల్లో చేరుకోగలవు. అణ్వస్త్ర ప్రయోగం కోసం రష్యా ఒక ఆదేశిక వ్యవస్థను రూపొందించుకుంది. దీని ప్రకారం ఈ బాంబు ప్రయోగానికి దేశాధ్యక్షుడు, రక్షణ మంత్రి లేదా చీఫ్‌ ఆఫ్‌ ద జనరల్‌ స్టాఫ్‌ నుంచి అనుమతి పొందాల్సి ఉంటుంది. ‘చెగెట్‌ అణు సూట్‌కేస్‌’ ద్వారా భద్రంగా ఈ ప్రక్రియ సాగుతుంది. వీటి ఆధారంగా అణ్వస్త్రాలను ‘అన్‌లాక్‌’ చేసి, ప్రయోగానికి పచ్చజెండా ఊపే అధికారం సైనికాధికారులకు ఉంటుంది. ఉక్రెయిన్ యుద్ధంలో ఇప్పటివరకూ అటు అణ్వస్త్రాలు, ఇటు సాధారణ ఆయుధాలనూ ప్రయోగించే ‘డ్యుయెల్‌ కేపబుల్‌’ వాహనాల’ను ఉక్రెయిన్ సరిహద్దుల్లో మోహరించింది. అయితే అణ్వస్త్రాలను కానీ వాటిని ప్రయోగించే బలగాలను కానీ రంగంలోకి దించిన సంకేతాలు ఎక్కడా లేవు.