Russia-Ukraine crisis: రష్యా దాడులతో ఉక్రెయిన్ చిగురురుటాకులా వణికిపోతోంది. ఫిబ్రవరి 24 నుంచి ఉక్రెయిన్పై బాంబులు, తుపాకులతో విరుచుకుపడుతున్న రష్యా 19వ రోజు అంతే తీవ్రత విరుచుకుపడింది. మైకోలైవ్‌ ప్రాంతంపై రష్యా జరిపిన దాడిలో 9 మంది ప్రాణాలు కోల్పోయినట్లు ఉక్రెయిన్ ఆరోపించింది. కీవ్‌లోని ఓ అపార్ట్మెంట్ బ్లాక్‌పై రష్యా క్షిపణి దాడి చేయగా ఇద్దరు మృత్యువాత పడ్డారు. మరో 12 మంది గాయపడ్డారు. క్షిపణి ధాటికి అపార్ట్‌మెంటు పక్కనే ఉన్న టీవీ టవర్‌ ధ్వంసమైనట్లు ఉక్రెయిన్ ఆరోపించింది. కీవ్‌లోని అంటోనొవ్‌ విమాన సంస్థపై జరిగిన వైమానిక దాడిలో మరో ఇద్దరు ప్రాణాలు కోల్పోయినట్లు ఉక్రెయిన్ మీడియా పేర్కొంది. జెలెనోగోయ్‌ ప్రాంతంలోని ఓ పాఠశాల భవనంపై రష్యా సేనలు దాడి చేయగా పలువురు చిన్నారులు శిథిలాల కింద చిక్కుకొని గాయపడ్డారు. డొనెట్స్క్‌ ప్రాంతంలో ఉక్రెయిన్ బలగాలు జరిపిన దాడిలో 20 మంది మరణించినట్లు మాస్కో అనుకూల వాదులు ఆరోపించారు. అటు చెర్నోబిల్‌ అణువిద్యుత్‌ ప్లాంట్‌లో మరోమారు విద్యుత్‌ సరఫరాకు అంతరాయం ఏర్పడింది. ప్లాంట్‌కు విద్యుత్‌ను సరఫరా చేసే లైన్లపై రష్యా బలగాలు దాడి చేసినట్లు ఉక్రెయిన్ ఆరోపించింది.
ఉక్రెయిన్ ప్రధాన నగరాలే లక్ష్యంగా ముందుకు సాగుతున్న రష్యా సేనలు సోమవారం రాజధాని కీవ్‌కు మరింత చేరువయ్యారు. మరియుపోల్, ఖర్కివ్‌, మైకోలైవ్‌, నిప్రో, చెర్నివ్‌, సుమీ నగరాలపై ఆధిపత్యం సాధించే దిశగా మాస్కో సేనలు సాగుతున్నాయి. ప్రాణ నష్టం జరుగుతుందన్న ఉద్దేశంతోనే ఉక్రెయిన్‌లోని అతిపెద్ద నగరాలను స్వాధీనం చేసుకోవడం లేదని రష్యా పేర్కొంది. ఐతే వాటిని స్వాధీనం చేసుకునే అవకాశాలను రష్యా తోసిపుచ్చలేదు. పలు నగరాలపై పట్టు సాధించినప్పటికీ పుతిన్‌ ఆదేశాలకు అనుగుణంగా నడుచుకుంటున్నట్లు రష్యా సేనలు చెప్పాయి. మరోవైపు రాజధాని కీవ్‌కు సమీప ప్రాంతాలైన లూహాన్స్క్‌, తూర్పు ప్రాంత పట్టణాల్లోని పౌరులను 10 మానవ కారిడార్‌ల ద్వారా తరలిస్తున్నట్లు ఉక్రెయిన్ ప్రభుత్వం ప్రకటించింది. తమ దేశ గగనతలాన్ని నో ఫ్లై జోన్‌గా ప్రకటించాలని ఉక్రెయిన్ అధ్యక్షుడు జెలెన్స్కీ నాటోకు, మరోసారి విజ్ఞప్తి చేశారు. లేకుంటే రష్యా నాటో దేశాలపై కూడా బాంబులు వేస్తుందని హెచ్చరించారు.
మరోవైపు, రష్యా యుద్ధం ప్రారంభించిన తర్వాత ఉక్రెయిన్ నుంచి లక్షలాది మంది శరణార్ధులుగా ఇతర దేశాలకు తరలిపోయారని ఐక్యరాజ్యసమితి తెలిపింది. ఇప్పటివరకు 28 లక్షల మంది ప్రాణాలు గుప్పిట్లో పెట్టుకొని దేశాన్ని వీడినట్లు ఆవేదన వ్యక్తం చేసింది. 19 రోజుల వ్యవధిలో 17లక్షల మంది ఉక్రెనియన్లు పోలాండ్‌కు వెళ్లినట్లు వివరించింది.