రన్వేపై దూసుకెళ్లిన విమానం గాల్లోకి ఎగిరింది. కొద్ది క్షణాల్లోనే భారీ కుదుపు! రెక్కలు తెగిన పక్షిలా ఊగిపోతోంది. ఏమవుతుందో తెలియక ప్రయాణికుల హాహాకారాలు చేస్తున్నారు. ఒక్కసారిగా లోహ విహంగం పంట పొలాల్లో దిగింది. అదృష్టవశాత్తూ ప్రాణనష్టం జరగలేదు.
రష్యాకు చెందిన ఎ-321 విమానానికి గురువారం త్రుటిలో పెను ప్రమాదం తప్పింది. మాస్కోలోని జుకోవ్స్కీ ఎయిర్పోర్ట్ నుంచి గాల్లోకి లేచిన కొద్దిసేపటికే గుంపుగా వచ్చిన పక్షులు విమానాన్ని ఢీకొట్టాయి. ఇంజిన్లలోకి కొన్ని పక్షలు చొచ్చుకుపోయాయి. ప్రమాదాన్ని గ్రహించిన పైలట్ విమానాన్ని వెంటనే చాకచక్యంగా పొలాల్లో దించారు. ఆ సమయంలో విమానంలో 226 మంది ప్రయాణికులు, ఏడుగురు సిబ్బంది ఉన్నారు. అత్యవసర ల్యాండింగ్ వల్ల కుదుపులకు గురై 23 మంది ప్రయాణికులు గాయపడ్డారు. ప్రాణ నష్టాన్ని నివారిస్తూ సురక్షితంగా విమానాన్ని దింపిన పైలట్ పై ప్రశంసల వర్షం కురిసింది.
ఇదీ చూడండి : తుపాను ధాటికి జపాను అతలాకుతలం
