నవంబర్​ 9న కర్తార్​పుర్​ నడవా ప్రారంభం... కానీ...

కర్తార్​పుర్ నడవాను నవంబర్ ​9న ప్రారంభిస్తామని పాక్ ప్రధాని ఇమ్రాన్​ఖాన్​ ప్రకటించారు. అయితే యాత్రికుల నుంచి సేవా రుసుము కింద 20 డాలర్లు వసూలు చేయాలని పాక్ పట్టుబడుతుండడం వల్ల ఆన్​లైన్ రిజిస్ట్రేషన్లు ఇంకా ప్రారంభం కాలేదు.

దాయాది దేశాల మధ్య ఆధ్యాత్మిక వారధిగా చెబుతున్న కర్తార్​పుర్​ నడవా​ను నవంబర్​ 9న ప్రారంభిస్తామని పాకిస్థాన్​ ప్రధాని ఇమ్రాన్​ఖాన్​ ప్రకటించారు. సిక్కు మత స్థాపకుడు గురునానక్ ​దేవ్ 550వ జయంతి (నవంబర్​ 12) నాటికి నడవాను తెరుస్తారా అన్న ప్రశ్నకు ఇమ్రాన్ ఇలా స్పందించారు.

"కర్తార్​పుర్ ప్రాజెక్టు నిర్మాణ పనులు చివరిదశలో ఉన్నాయి. కనుక 2019 నవంబర్ 9న ప్రపంచవ్యాప్తంగా ఉన్న సిక్కుల కోసం కర్తార్​పుర్ నడవాను తెరిచేందుకు పాకిస్థాన్​ సిద్ధంగా ఉంది.

ప్రపంచంలోని అతిపెద్ద గురుద్వారాను భారత్, ప్రపంచంలోని ఇతర ప్రాంతాలకు చెందిన భక్తులు సందర్శిస్తారు. ఇది సిక్కులకు ప్రధాన మత కేంద్రంగా మారుతుంది. స్థానిక ఆర్థిక పరిస్థితులను మెరుగుపరుస్తుంది. ప్రయాణ, ఆతిథ్య రంగాల వల్ల దేశానికి విదేశీ మారకద్రవ్యం చేకూరుతుంది."
- ఇమ్రాన్​ఖాన్​, పాక్ ప్రధాన మంత్రి

మన్మోహన్​ సింగ్ వెళ్తారు కానీ...

కర్తార్​పుర్​ నడవా ప్రారంభోత్సవానికి భారత మాజీ ప్రధాని మన్మోహన్​సింగ్ హాజరుకారని తెలిసింది. అయితే... ఆయన ఓ సాధారణ భక్తుడిలా గురుద్వారా సందర్శనకు వెళ్తారని ఆయనకు సన్నిహితంగా ఉండే వర్గాలు తెలిపాయి. నడవా ప్రారంభోత్సవానికి రావాలని పాక్​ విదేశాంగ మంత్రి మహమూద్​ ఖురేషీ రాసిన లేఖకు మన్మోహన్ ఈమేరకు బదులిచ్చినట్లు వెల్లడించాయి.

పంజాబ్ ముఖ్యమంత్రి అమరీందర్ సింగ్ నేతృత్వంలోని సిక్కుల బృందంలో మన్మోహన్​ ఉంటారని తెలిసింది. ఆ బృందం కర్తార్​పుర్​లో ప్రార్థనలు చేసి, అదే రోజు భారత్​కు తిరిగి​ వస్తుంది.

ఆరంభంకాని ఆన్​లైన్​ రిజిస్ట్రేషన్​

కర్తార్​పుర్​ యాత్రకు ఆన్​లైన్ నమోదు ప్రక్రియ ఇంకా ప్రారంభం కాలేదు. యాత్రికుల నుంచి సేవారుసుము కింద 20 డాలర్లు వసూలు చేయాలని పాక్​ పట్టుబడుతుండడమే ఇందుకు కారణం. సేవా రుసుము వసూలు చేయకూడదన్నది భారత్​ వాదన. దీనితోపాటు మరికొన్ని విషయాల్లో రెండు దేశాల మధ్య ఏకాభిప్రాయం కుదరాల్సి ఉంది. ఫలితంగా ఆన్​లైన్​ నమోదు ప్రక్రియ వాయిదా పడింది.

చెరో సగం

ప్రతిపాదిత కారిడార్​ పాకిస్థాన్​ కర్తార్​పుర్​లోని దర్బార్​సాహిబ్​ను, పంజాబ్ గురుదాస్​పుర్​ జిల్లాలో గల బాబా నానక్​ మందిరంతో కలుపుతుంది. ఫలితంగా ప్రతిరోజూ సుమారు 5వేల మంది భారతీయ సిక్కు భక్తులు, యాత్రికులు వీసాలేకుండానే పాక్​లోని పవిత్ర క్షేత్రాన్ని దర్శించుకునే అవకాశం కలుగుతుంది.

పాకిస్థాన్... భారత సరిహద్దు నుంచి కర్తార్​పుర్​లోని గురుద్వారా దర్బార్​ సాహిబ్​ వరకు నడవా నిర్మిస్తుండగా, ఇటువైపు పంజాబ్​లోని గురుదాస్​పుర్ జిల్లాలోని డేరాబాబా నానక్​ నుంచి సరిహద్దుల వరకు భారత్​ ఈ నడవాను నిర్మిస్తోంది.

ఇదీ చూడండి:ఒడిశాలో ఘోరం- ద్విచక్రవాహనంపై మృతదేహం తరలింపు