పాక్​ను సుతిమెత్తగా హెచ్చరించిన ఐసీఏఓ

పాకిస్థాన్​ను అంతర్జాతీయ పౌర విమానయాన సంస్థ (ఐసీఏఓ) సుతిమెత్తగా హెచ్చరించింది. భారత ప్రధాని నరేంద్ర మోదీ తమ గగనతలం మీదుగా ప్రయాణించేందుకు పాక్ నిరాకరించడాన్ని తప్పుపట్టింది. చికాగో కన్వెన్షన్​ నిబంధనలు జాతీయ నాయకులు ప్రయాణించే విమానాలకు వర్తించవని స్పష్టం చేసింది.

ప్రధాని నరేంద్ర మోదీ తమ గగనతలం మీదుగా ప్రయాణించేందుకు నిరాకరించిన పాకిస్థాన్​ను అంతర్జాతీయ పౌర విమానయాన సంస్థ (ఐసీఏఓ) సుతిమెత్తగా హెచ్చరించింది. జాతీయ నాయకులను తీసుకెళ్లే విమానాలను 'స్టేట్​ ఎయిర్​క్రాఫ్ట్'గా పరిగణిస్తారని, చికాగో ఒడంబడిక ప్రకారం ఈ విమానాలకు నిబంధనలు వర్తించవని స్పష్టం చేసింది.

"కన్వెన్షన్ ఆన్​ ఇంటర్నేషనల్ సివిల్ ఏవియేషన్​ (చికాగో కన్వెన్షన్​) నిబంధనలు కేవలం పౌర విమాన కార్యకలాపాలకు మాత్రమే వర్తిస్తాయి. ఈ నిబంధనలు జాతీయ నాయకులు ప్రయాణించే విమానాలకు, సైనిక విమానాలకు మాత్రం వర్తించవు."

- ఐసీఏఓ అధికార ప్రతినిధి

భారత్​ ఫిర్యాదు..

ప్రధాని మోదీ సౌదీ అరేబియా పర్యటనకోసం పాకిస్థాన్​ మీదుగా ప్రయాణించాల్సి ఉంది. అయితే మోదీ విమానం తమ గగనతలం మీదుగా ప్రయాణించేందుకు పాకిస్థాన్ అనుమతి​ నిరాకరించింది. జమ్ముకశ్మీర్​లో మానవహక్కుల ఉల్లంఘనలు జరుగుతున్నాయని ఆరోపిస్తూ ఈ నిర్ణయం తీసుకుంది. దీన్ని తీవ్రంగా పరిగణించిన భారత్​.. ఐసీఏఓ దృష్టికి తీసుకెళ్లింది.

ఐసీఏఓ అంటే

ఐసీఏఓ.. ఐక్యరాజ్యసమితి చెందిన ఓ ఏజెన్సీ. ఇది 'చికాగో కన్వెన్షన్' పాలనా బాధ్యతలు నిర్వహిస్తుంది.

ఇదీ చూడండి: