'భారత్​-నేపాల్​ మధ్య అపార్థాలు తొలగిపోయాయి'

భారత్​తో నేపాల్​ బంధంపై కీలక వ్యాఖ్యలు చేశారు ఆ దేశ ప్రధాని కేపీ శర్మ ఓలీ. ఇరు దేశాల మధ్య ఉన్న విభేదాలు తొలగిపోయాయని స్పష్టం చేశారు. కరోనా వేళ భారత్​ మరింత సాయం అందించాలని పేర్కొన్నారు ఓలీ.

భారత్​, నేపాల్​ మధ్య నెలకొన్న అపార్థాలు తొలగిపోయాయని అన్నారు ఆ దేశ ప్రధాన మంత్రి కేపీ శర్మ ఓలీ. సరిహద్దు దేశాలు కష్టాలను, ప్రేమను కూడా పంచుకుంటాయని వ్యాఖ్యానించారు. తొలగిపోయిన అపార్థాల గురించే ఆలోచించకకుండా.. ఇరు దేశాలు భవిష్యత్తు కార్యాచరణపై దృష్టిపెట్టాలని అభిప్రాయపడ్డారు. ఇటీవల ఓ ప్రముఖ వార్త సంస్థకు ఇచ్చిన ఇంటర్వ్యూలో ఈ వ్యాఖ్యలు చేశారు ఓలీ.

"సరిహద్దు దేశాల మధ్య సమస్యలు రావడం సహజం. చిలీ, అర్జెంటీనా మధ్య సమస్యలు ఉండట్లేదా? ఇతర దేశాల కన్నా నేపాల్​కు భారత్​తో ప్రత్యేక అనుబంధం ఉంది. కరోనా మహమ్మారి విజృంభిస్తున్న వేళ నేపాల్​కు ఇతర దేశాలతో పోలిస్తే భిన్న రీతిలో భారత్​ సాయం అందించాలి. ఇరు దేశాలకు ఓపెన్ బార్డర్స్​ ఉన్నాయి. కాబట్టి నేపాల్​లోని పలు ప్రాంతాలపై భారత్​ ప్రత్యేక దృష్టి సారించాల్సిన అవసరం ఉంది."

-కేపీ శర్మ ఓలీ, నేపాల్​ ప్రధాన మంత్రి

'భారత్​ తగిన సాయం చేయట్లేదు'

భారత్​లో మహమ్మారిని కట్టడి చేయగలిగినా.. నేపాల్​లో పరిస్థితి మారకపోతే దాని వల్ల ఫలితం ఉండదన్నారు ఓలీ. మరోసారి వైరస్​ వ్యాప్తి చెందే అవకాశం ఉండటమే అందుకు కారణమని పేర్కొన్నారు. వ్యాక్సిన్​, వైద్య సహాయం అందించినందుకు భారత్​కు ధన్యవాదాలు చెప్పిన ఓలీ.. నేపాల్​ ఆశించినంత సాయంలో భారత్​ ఆదుకోలేదని తెలిపారు. అయితే ఈ వ్యాఖ్యల అర్థం తమకు భారత్​ నుంచి సాయం అందలేదని ఆరోపిస్తున్నట్టు కాదని స్పష్టం చేశారు.

ఇప్పటివరకు నేపాల్​కు చైనా 18 లక్షల టీకాలను పంపిణీ చేసిందని.. భారత్​ 21 లక్షల టీకాలను అందించిందని ఓలీ వెల్లడించారు. ఇరు దేశాలు వైద్య పరికరాలను కూడా పంపిణీ చేస్తున్నాయని తెలిపారు. ఈ సందర్భంగా ఇరు దేశాలకు ఓలీ ధన్యవాదాలు తెలిపారు.

ఇదీ చదవండి :'వుహాన్ ల్యాబ్​ నుంచే కరోనా లీక్- ఇదే సాక్ష్యం...'