వారందరికీ ధన్యవాదాలు తెలిపిన కిమ్​!

ఉత్తర కొరియా అధ్యక్షుడు కిమ్​ ఆరోగ్య పరిస్థితులు ప్రపంచవ్యాప్తంగా చర్చనీయాంశమయ్యాయి. ఈ నేపథ్యంలో కిమ్​కు సంబంధించిన ఓ వార్తను ఉత్తర కొరియా అధికారిక మీడియా బయటపెట్టింది. దేశంలోని ఓ భారీ పర్యటక రిసార్టు నిర్మాణానికి పనిచేస్తున్న కార్మికులకు కిమ్​ ధన్యవాదాలు చెప్పారని కథనం పేర్కొంది. అయితే అధ్యక్షుడి ఆరోగ్య వివరాలను చెప్పలేదు. కానీ కిమ్​ ఆరోగ్యంగా ఉన్నట్టు దక్షిణ కొరియా విశ్వస్తోంది.

గత కొన్ని రోజులుగా ప్రపంచవ్యాప్తంగా హాట్​ టాపిక్​గా మారిన ఉత్తరకొరియా అధ్యక్షుడు కిమ్​కు సంబంధించిన మరో వార్త తాజాగా చర్చనీయాంశమైంది. దేశవ్యాప్తంగా దేశంలోని ఓ భారీ పర్యటక రిసార్టు నిర్మాణంలో పని చేస్తున్న కార్మికులకు.. కిమ్​ ధన్యవాదాలు చెప్పారని ఉత్తర కొరియా అధికారిక మీడియా కథనం ప్రచురించింది.

"వోన్సన్​-కల్మా రిసార్టు నిర్మాణానికి శ్రమిస్తున్న కార్మికులు, అధికారులకు.. గౌరవనీయులైన కిమ్​ జోంగ్​ ఉన్​ ధన్యవాదాలు తెలిపారు."

-- ఉత్తర కొరియా అధికారిక మీడియా.

ఈ కథనంలో కిమ్​ తాజా కార్యకలాపాలు, ఆరోగ్యంపై ఎలాంటి వివరాలు లేకపోవడం గమనార్హం.

ఈ నెల 15న కిమ్‌ తన తాత 108వ జయంతి కార్యక్రమానికి గైర్హాజరయ్యారు కిమ్​. దేశంలోనే అతి ముఖ్యమైన రోజు అది. అప్పటి నుంచి కిమ్​ ఆరోగ్యంపై అనేక ఊహాగానాలు, వార్తలు వస్తున్నాయి. కిమ్‌ చనిపోయి ఉండొచ్చని.. ఆయనకు కరోనా వైరస్‌ సోకి ఉండొచ్చని లేదా ఆ మహమ్మారి బారిన పకుండా ఉండేందుకు విడిగా ఉంటున్నారని.. తీవ్ర అనారోగ్యానికి గురయ్యారని.. ఇలా రకరకాల వార్తలు వచ్చాయి.

'కిమ్​ బతికే ఉన్నారు...'

అయితే కిమ్​ ఆరోగ్యంపై వస్తున్న వార్తలను దక్షిణ కొరియా మొదటి నుంచి ఖండిస్తూనే ఉంది. కిమ్​ బతికే ఉన్నట్టు.. ఆయన ఆరోగ్యంగానే ఉన్నట్టు తమకు చాలా నమ్మకంగా ఉందని తెలిపింది.

కిమ్​కు ఏదైనా జరిగితే వెంటనే పసిగట్టే నిఘా వ్యవస్థ తమకుందని దక్షిణ కొరియా మంత్రి కిమ్​ యోన్​ చుల్​ తెలిపారు. అయితే ఇప్పటివరకు తమకు అలాంటి సమాచారం లభించకపోవడం వల్లే కిమ్​ ఆరోగ్యంగా ఉన్నారని కచ్చితంగా చెబుతున్నట్టు వెల్లడించారు.

ఇదీ చూడండి:-కిమ్‌ అలా కావడానికి కారణం జున్ను!