'చైనా నుంచే కఠిన సవాళ్లు.. భారత్​తో కలిసి పనిచేసేందుకు సిద్ధం'

US on China threat: క్వాడ్ సమావేశాల్లో భాగంగా ఇండో-పసిఫిక్ వ్యూహాత్మక నివేదికను అమెరికా విడుదల చేసింది. భారత్​కు అతిపెద్ద ముప్పు చైనానే అని స్పష్టం చేసింది. ఈ ప్రాంతాన్ని బలోపేతం చేసేందుకు కలిసి పనిచేస్తామని చెప్పింది.

Indo Pacific strategy: భారత్​ను భౌగోళిక రాజకీయ సవాళ్లు చట్టుముట్టి ఉన్నాయని అగ్రరాజ్యం తెలిపింది. ప్రత్యేకించి వాస్తవాధీన రేఖ విషయంలో చైనా ప్రవర్తన భారత్​కు ఓ ముఖ్య సవాల్​ అని పేర్కొంది. క్వాడ్ సమావేశాల్లో భాగంగా ఇండో-పసిపిక్​ వ్యూహాత్మక నివేదికను విడుదల చేస్తూ అమెరికా ఈ వ్యాఖ్యలు చేసింది.

శుక్రవారం అమెరికా విడుదల చేసిన వ్యూహాత్మక నివేదిక.. అధ్యక్షుడు జో బైడెన్ నేతృత్వంలోని పరిపాలన విభాగం మొట్ట మొదటి ప్రాంతీయ నిర్దిష్ట నివేదిక. ఇది ఇండో-పసిఫిక్‌లో అమెరికా స్థానాన్ని దృఢం చేయడం, ఈ ప్రాంతాన్ని బలోపేతం చేయడం, ఈ ప్రక్రియలో భారత్​ ఎదుగుదలకు, ప్రాంతీయ నాయకత్వానికి మద్దతు ఇచ్చేందుకు అధ్యక్షుడి విజన్​ను సూచిస్తోంది.

"వ్యూహాత్మక భాగస్వామ్య నిర్మాణాన్ని కొనసాగిస్తాం. దక్షిణాసియాలో స్థిరత్వాన్ని ప్రోత్సహించడానికి అమెరికా, భారత్​ కలిసి ప్రాంతీయ సమూహాల ద్వారా కలిసి పని చేస్తాయి. ఆరోగ్యం, అంతరిక్షం, సైబర్‌స్పేస్, ఆర్థిక, సాంకేతిక సహకారాన్ని పెంచుకుంటాం. స్వేచ్ఛ, బహిరంగ ఇండో-పసిఫిక్‌ కోసం ముందుకుసాగుతాం" అని శ్వేతసౌధం తెలిపింది.

మెల్‌బోర్న్‌లో జరుగుతున్న క్వాడ్ సభ్యదేశాల విదేశాంగ మంత్రుల సమావేశాల్లో భాగంగా భారత్, అమెరికా విదేశాంగశాఖ మంత్రులు జైశంకర్, ఆంటోనీ బ్లింకెన్ భేటీ అయ్యారు. ఇరుదేశాల ద్వైపాక్షిక సంబంధాల బలోపేతం, అఫ్గానిస్థాన్‌లో ప్రస్తుత పరిస్థితులు, రష్యా- ఉక్రెయిన్ సంక్షోభం, మయన్మార్‌లో ప్రజాస్వామ్యం భవిష్యత్తు, కొవిడ్ తాజా పరిస్థితులపై ఇరువురు నేతలు చర్చించారు. ఈ మేరకు అమెరికా విదేశాంగ శాఖ అధికార ప్రతినిధి వెల్లడించారు. క్వాడ్ కూటమి ద్వారా ఇండో పసిఫిక్ ప్రాంతంలో సహకారాన్ని బలోపేతం చేయడానికి తీసుకోవాల్సిన చర్యలపైనా ఇరువురు నేతలు చర్చించినట్లు తెలిపారు.

జైశంకర్ మాట్లాడుతూ.. సరిహద్దులో ఉద్రిక్తతలకు చైనానే కారణమని తెలిపారు. ఆ దేశం లిఖితపూర్వక ఒప్పందాలను ఉల్లంఘించడం వల్లే సమస్యలు తలెత్తుతున్నాయని పేర్కొన్నారు. సరిహద్ధులో సైన్యాన్ని భారీగా మోహరించవద్దని ఒప్పందంలో ఉన్న చైనా దాన్ని పెడచెవిన పెడుతోందని విమర్శించారు.

ఇదీ చదవండి:'రెండు రోజుల్లో ఉక్రెయిన్​పై రష్యా దండయాత్ర'