గూగుల్​ పొరపాటుతో యావద్దేశం షాక్

గూగుల్ చేసిన తప్పిదంతో హాంగ్​కాంగ్​ మొత్తం సామాజిక మాధ్యమాల్లో భగ్గుమంది. నేరపూరిత కేసుల విచారణ నిమిత్తం తమ దేశ పౌరులను చైనాకు అప్పగించాలన్న బిల్లుకు వ్యతిరేకంగా హాంగ్​కాంగ్​లో వారం రోజులుగా నిరసనలు హోరెత్తాయి. ఈ విషయంపై గూగుల్​ అనువాదంలో తలెత్తిన లోపం క్షణాల్లో వైరల్​గా మారింది.

గూగుల్.. ఏ సమాచారం కావాలన్నా నిమిషాల్లో మన ముందు ఉంచుతుంది. అయితే కొన్నిసార్లు ఇందులో తలెత్తిన లోపాలు దిగ్గజ సంస్థకు తలనొప్పులు తెచ్చిపెట్టిన సందర్భాలు ఉన్నాయి. తాజాగా హాంగ్​కాంగ్​లో వెల్లువెత్తుతోన్న ప్రజా నిరసనలకు గూగుల్​ లోపం ఆజ్యం పోసింది.

'ఐ ఏమ్​ సాడ్​ టు సీ హాంగ్​కాంగ్​ బికమ్​ పార్ట్​ ఆఫ్​ చైనా' (హాంగ్​కాంగ్​... చైనాలో భాగం కావడాన్ని చూసేందుకు నేను చింతిస్తున్నా) అనే వాక్యాన్ని చైనీస్​లోకి గూగుల్​ అనువాదం చేశారు కొందరు నెటిజన్లు. అయితే ఆశ్చర్యంగా 'సాడ్'(బాధ) స్థానంలో 'హ్యాపీ'(ఆనందం) అనే అర్థాన్ని ఇస్తూ గూగుల్​ అనువాదం చేసింది. ఈ విషయాన్ని గమనించిన నెటిజన్లు షాక్​ అయ్యారు. క్షణాల్లో ఇది వైరల్​ అయింది.

గూగుల్​ అనువాదంలో లోపం

ఈ విషయంపై స్పందించిన గూగుల్​ సిబ్బంది ఒకరు సమస్యను గుర్తించి వెంటనే పరిష్కరిస్తామని తెలిపారు. సాధారణంగా కష్టమైన అల్గారిథమ్స్​, కంప్యూటర్​ లాంగ్వేజస్​, అనువాదాలను చిటికెలో చేస్తోంది గూగుల్. అయితే ఈ సమస్య ఎక్కడ తలెత్తిందో తెలియక తర్జనభర్జనలు పడింది సంస్థ యాజమాన్యం. ఎట్టకేలకు ఒక గంట తర్వాత సరైన అనువాదం వచ్చింది.

నేరాలకు పాల్పడ్డ తమ దేశస్తులను విచారణ నిమిత్తం అవసరమైతే చైనాకు అప్పగించేందుకు వీలుగా హాంగ్​కాంగ్​ ప్రభుత్వం చట్టం తీసుకురావాలని యోచిస్తోంది. ఈ వివాదాస్పద బిల్లుపై ప్రజాగ్రహం పెల్లుబికింది. గత వారం రోజులుగా నిరసనలు మిన్నంటుతున్నాయి.

• ఇదీ చూడండి: ట్రంప్​ 'విదేశీ' వ్యాఖ్యలు- ప్రతిపక్షం చురకలు