హాంకాంగ్లోని ఓ దుకాణంలో కొత్తగా తయారుచేసిన ఐస్క్రీం.. ఇటీవలె నగరంలో జరిగిన ఉద్యమ పరిణామాలకు సాక్ష్యంగా మారింది. ఘాటు మిరియాలతో తయారైన ఈ చల్లని పదార్థం తిన్నవారు.. ఆందోళనల సమయంలో పోలీసులు ప్రయోగించిన బాష్పవాయువును గుర్తు చేసుకుంటున్నారు.
మిరియాలతో పాటు వసాబీ, ఆవాలను కలిపి తయారైన ఈ ఐస్క్రీం... ఘాటైన రుచితో.. గొంతులో మంట, చికాకు కలిగిస్తోంది. ఫలితంగా కస్టమర్లకు నిరసనల నాటి అనుభవాలను కళ్లముందు ఉంచుతోంది.
ఐస్క్రీం బాష్పవాయువు రుచిలా ఉంది. ఈ పదార్థాన్ని తిన్నప్పుడు ఊపిరి పీల్చుకోవడం చాలా కష్టంగా అనిపించింది. గొంతులో ఎంతో మంట, చికాకు కలిగించింది. వెంటనే ఎక్కువగా నీరు తాగాలనిపించింది. నిరసనల సమయంలో నేను మర్చిపోలేని అనుభవాలను ఈ ఐస్క్రీం రుచి గుర్తు చేసింది.
అనితా వాంగ్, కస్టమర్
ప్రభుత్వానికి వ్యతిరేకంగా చేపట్టిన ఉద్యమాన్ని కొనసాగించాలని, ఇప్పటివరకు చోటుచేసుకున్న పరిణామాలను ప్రజలు మర్చిపోకూడదనే ఉద్దేశంతో... బాష్పవాయువు రుచితో ఐస్క్రీంను తయారు చేసినట్లు దుకాణదారుడు తెలిపాడు.
ఐస్క్రీంను నల్ల మిరియాలతో తయారు చేస్తాం. వాటిని వేయించి మెత్తగా చేసి, ఇటాలియన్ తరహాలో జెలాటోగా మారుస్తాం. కాస్త ఘాటుగా ఉన్నప్పటికీ.. రుచి మాత్రం బాష్ప వాయువు పీల్చుకున్న అనుభూతినిస్తుంది.
దుకాణం యజమాని
ఈ రకమైన ఐస్క్రీంను 5 డాలర్లకు విక్రయిస్తున్నారు. ప్రస్తుతం కరోనా పరిస్థితులు నెలకొన్న కారణంగా.. 20 నుంచి 30 స్కూబ్ల వరకు కొనుగోలవుతున్నట్లు యజమాని వెల్లడించాడు.
'టియర్గ్యాస్'తో టేస్టీ 'ఐస్క్రీం'... తింటే ఉక్కిరిబిక్కిరి ఖాయం హింసాత్మకంగా మారిన ఘర్షణలు..
నేరస్థులను చైనాకు అప్పగించే బిల్లుకు వ్యతిరేకంగా మొదలైన ఉద్యమం.. కొన్ని నెలల్లోనే తారస్థాయికి చేరుకుంది. ఈ ఆందోళనల్లో పోలీసులు, నిరసనకారుల మధ్య చోటుచేసుకున్న ఘర్షణలు.. హింసాత్మకంగా మారాయి. వారిని చెదరగొట్టేందుకు 16వేల రౌండ్లకు పైగా బాష్పాయువును ప్రయోగించారు పోలీసులు.
ప్రభుత్వం ఈ బిల్లు ఉపసంహరించుకున్నప్పటికీ.. చైనా నుంచి విముక్తి కావాలని కోరుతూ నిరసనలు కొనసాగాయి. ప్రస్తుతం నగరంలో కరోనా విజృంభిస్తుండటం వల్ల.. ఆందోళనలు దాదాపుగా చల్లబడ్డాయి. అయితే, ఈ వేసవిలో ప్రదర్శనకారులు పెద్దఎత్తున చర్యలు చేపట్టే అవకాశం ఉన్నట్లు నిపుణులు తెలిపారు.
