అఫ్గానిస్థాన్‌ను ఆక్రమించుకున్న తాలిబన్లు(Taliban) తమ అరాచకాలను కొనసాగిస్తున్నారు. తమకు వ్యతిరేకంగా ఉన్నవారిని, ఒకప్పుడు వారికి వ్యతిరేకంగా ఉద్యమాలు చేసినవారిపై ఉక్కుపాదం మోపుతున్నారు. తాజాగా ప్రముఖ జానపద గాయకుడు ఫవాద్ అందరాబీని పొట్టనపెట్టుకున్నారు. అతడి పేరుపై ఉన్న అందరాబీ పర్వత ప్రాంతంలోనే శుక్రవారం ఫవాద్‌ను హత్య చేసినట్లు గాయకుడి కుటుంబీకులు వెల్లడించారు. తిరుగుబాటుదారులే ఈ హత్య చేసి ఉంటారని తాలిబన్లు పేర్కొనడం గమనార్హం.
తండ్రి మృతిపట్ల ఫవాద్ కుమారుడు జవాద్‌ అందరాబీ ఆవేదన వ్యక్తం చేశాడు. 'కొద్దిరోజుల క్రితమే కొందరు తాలిబన్లు మా ఇంటికి వచ్చి నాన్నతో కలిసి టీ తాగారు. కానీ ఏమైందో ఏమో ఇంతలోనే మా నాన్నను పొట్టన పెట్టుకున్నారు' అంటూ జవాద్‌ వాపోయాడు. తన తండ్రి హత్యపై న్యాయం కోరుతూ స్థానిక తాలిబాన్ కౌన్సిల్‌ను ఆశ్రయింగా.. ఫవాద్ మృతికి కారణమైనవారిని గుర్తించి శిక్షిస్తామని వారు పేర్కొన్నట్లు జవాద్‌ తెలిపాడు. ఈ ఘటనపై దర్యాప్తు నిర్వహించి ఇందుకు కారకులైన తిరుగుబాటుదారులను శిక్షిస్తామని తాలిబన్ల ప్రతినిధి జబీహుల్లా ముజాహిద్‌ వెల్లడించారు.